لاہور ، 7 اپریل (سیاست ڈاٹ کام) پاکستان ہاکی فیڈریشن نے ہندوستانی مالی امداد کی پیشکش مسترد کر دی۔ سکریٹری فیڈریشن رانا مجاہد علی کا کہنا ہے کہ کسی ہمسایہ ملک سے حصولِ مدد کا سوچ بھی نہیں سکتے۔ تفصیلات کے مطابق پی ایچ ایف گزشتہ دو سال سے مالی بحران کا شکار ہے۔ اسلام آباد میں جاری پاکستان ہاکی کا کیمپ بھی فنڈز کی کمی کے باعث ختم کر دیا گیا تھا، اس صورتحال کے بعد انڈیا ہاکی ( ایچ آئی ) نے پاکستان کو مالی مدد کی پیشکش کی تھی۔ تاہم پی ایچ ایف نے ہندوستانی آفر کو مسترد کر دیا ہے اور ہندوستانی ہاکی فیڈریشن کو جوابی ای میل بھی بھیج دیا گیا ہے۔ پاکستان ہاکی فیڈ ریشن کے سکریٹری رانا مجاہد نے کہا ہے کہ وزیراعظم نواز شریف اور وزیراعلیٰ پنجاب شہباز شریف پاکستان ہاکی کے مالی بحران کو جلد حل کر لیں گے اور ہاکی ٹیم کا تربیتی کیمپ دوبارہ شروع کر دیا جائیگا۔ واضح رہے کہ پاکستان ہاکی فیڈریشن گذشتہ دو برس سے مالی بحران کا شکار ہے۔ یو این پی کے مطابق پی ایچ ایف کا خزانہ خالی ہونے کی وجہ سے جہاں کھلاڑیوں کو 24 ماہ سے سنٹرل کنٹراکٹ نہیں مل سکے ہیں وہیں اولمپک کوالیفائنگ راؤنڈ کی تیاریوں کیلئے اسلام آباد میں لگایا جانے والا کیمپ بھی گزشتہ دنوں اچانک ختم کر دیا گیا تھا۔ پی ایچ ایف نے باڈی کے پیٹرن انچیف اور وزیراعظم پاکستان نواز شریف سے 50 کروڑ روپے گرانٹ دینے کی درخواست کر رکھی ہے لیکن گزشتہ ڈیڑھ برس گزر جانے کے باوجود اس پر کوئی پیشرفت نہیں ہوئی ہے۔
