پہلے ٹسٹ میں ہندوستان کے کئی ریکارڈز

اڈیلیڈ۔10 ڈسبمر (سیاست ڈاٹ کام) ہندوستانی ٹیم نے آسٹریلیا کیخلاف چار ٹسٹ میچوں کی سیریز کا آغاز کامیابی کے ساتھ کیا ہے۔ اڈیلیڈ میں کھیلے گئے پہلے ٹسٹ میں قومی ٹیم نے 31 رنوں سے کامیابی درج کی ہے۔ ہندوستان نے آسٹریلیا کو 323 رنوں کا ہدف دیا تھا ، جس کے جواب میں میزبان ٹیم 291 رنوں پر ہی آل آوٹ ہوگئی۔ ہندوستانی ٹیم کی اس کامیابی میں بیٹسمینوں کے ساتھ بولروں کا بھی اہم رول رہا۔ آخری اننگز میں بمراہ ، سمیع اور اشون کو فی کس 3 وکٹ ملے وہیں ایشانت شرما کو ایک کامیابی ملی لیکن کھلاڑیوں کی مجموعی کوششوں سے ہندوستانی ٹیم نے اس کامیابی میں کئی ریکارڈس بھی توڑ ڈالے۔ ویراٹ کوہلی ایشیائی ٹیموں کے پہلے کپتان بن گئے ہیں جنہوں نے انگلینڈ ، آسٹریلیا اور جنوبی افریقہ میں ٹسٹ میچ جیتا۔ وہیں ہندوستانی ٹیم ایک کلینڈر ایئر میں تین ممالک میں ٹسٹ جیتنے والی پہلی ایشیائی ٹیم ہے۔ ہندوستان نے 10 برسوں کے بعد آسٹریلیا میں ٹسٹ جیتا ہے۔ وہیں اڈیلیڈ کے میدان پر اس کی یہ صرف دوسری جیت ہے۔ ہندوستان نے سال 2003 میں اس میدان پر جیت درج کی تھی۔ ہندوستان نے آسٹریلیا کی زمین پر چھٹا ٹسٹ میچ جیتا ہے۔ ہندوستان نے پہلی مرتبہ آسٹریلیا کے دورہ پر ٹسٹ سیریز کا پہلا مقابلہ جیتا ہے۔ وہیں اڈیلیڈ میں آسٹریلیا نے 2010 کے بعد پہلا ٹسٹ میچ گنوایا ہے۔ ہندوستان نے پہلی مرتبہ بیرون ملک کھیلے گئے ٹسٹ میچ میں پہلے چار وکٹ 50 سے کم رنز پر گنوانے کے بعد کامیابی درج کی ہے۔ اڈیلیڈ ٹسٹ کی پہلی اننگز میں ہندوستان کے چار وکٹ صرف 41 رنوں پر گر گئے تھے ، اس کے باوجود اس نے ٹسٹ میچ جیتا۔ اڈیلیڈ ٹسٹ کے دوران 35 بیٹسمینس کیچ آوٹ ہوئے۔ یہ ایک عالمی ریکارڈ ہے۔ پہلے کبھی کسی ٹسٹ میچ میں اتنے بیٹسمین کیچ آوٹ نہیں ہوئے۔