جوہانسبرگ۔28 جنوری (سیاست ڈاٹ کام ) پاکستان نے ون ڈے سیریز کے چوتھے میچ میں جنوبی افریقہ کو 8 وکٹوں سے شکست دے کر سیریز 2-2 سے برابر کردی۔ گلابی ونڈے کے اس خاص موقع پرپاکستانی بیٹسمینوں نے میزبان ٹیم کے 165 رنز کے آسان ہدف کو پراعتماد انداز میں 2 وکٹوں کے نقصان پر 32 ویں اوور میں پورا کرلیا۔ گزشتہ میچ میں سنچری بنانے والے امام الحق نے اپنی شاندار کارکردگی کے سلسلے کو برقرار رکھتے ہوئے 71 رنز بنائے اور ناقدین کو خاموش رہنے پر مجبور کردیا جبکہ فخر زمان نے خوبصورت اننگز کھیلتے ہوئے44 رنز بنا ئے ، بابر اعظم 41 اور سرفراز احمد کی جگہ شامل ہونے والے وکٹ کیپر بیٹسمین محمد رضوان 4 رنز پر ناٹ آوٹ رہے۔ عمران طاہر اور فیلکوا نے فی کس ایک وکٹ حاصل کی۔ قبل ازیں پاکستان نے جنوبی افریقہ کے خلاف ٹاس جیت کر پہلے فیلڈنگ کا فیصلہ کیا تو میزبان ٹیم کی جانب سے ہاشم آملہ اورڈی کاک نے آغاز کیا تاہم شاہین آفریدی نے دوسرے ہی اوور میں ڈی کاک کوصفر پر پویلین بھیج دیا جس کے بعد ہینڈرکس بیٹنگ کیلئے آئے لیکن وہ بھی صرف 2 رنز بنانے کے بعد شاہین آفریدی کا شکار ہوگئے۔کپتان فاف ڈوپلیسی نے ہاشم آملہ کے ساتھ ملکر تیسری وکٹ کیلئے 101 رنز کی شراکت قائم کی، اس دوران دونوں نے نصف سنچریاں اسکور کیں۔ ڈوپلیسی 57 رنز بناکر شاداب خان اور ہاشم آملہ 59 رنز پر عماد وسیم کا شکار بنے جبکہ ڈیوڈ ملر بھی صرف 4 رنز کے ہی مہمان ثابت ہوئے۔حیران کن طور پر میزبان ٹیم کی آخری 5 وکٹیں صرف 8 رنز پر گریں اور 157 رنز پر پانچویں وکٹ گرنے کے بعد صرف 164 رنز ہی بناسکی۔ عثمان شنواری نے ایک ہی اوور میں حریف 3 کھلاڑیوں وین ڈیر ڈاسن، ڈیل اسٹین اور کاگیسو ربادا کوآوٹ کیا اور اگلے ہی اوور میں اینڈائل فیلکوایو کو 11 رنز پر آوٹ کردیا۔عمران طاہر کوشاداب خان نے آوٹ کیا۔ عثمان شنواری نے 4، شاداب خان اور شاہین آفریدی نے فی کس2 جبکہ محمد عامر اورعماد وسیم نے فی کس ایک وکٹ حاصل کی۔ کپتان سرفراز احمد پر 4 میچوں کی پابندی کے باعث شعیب ملک نے کپتان اور محمد رضوان نے وکٹ کیپر کے فرائض انجام دئیے، حسن علی کی جگہ عثمان شنواری کو ٹیم میں شامل کیا گیا۔عثمان شنواری نے 35رنز دیکر 4وکٹیں حاصل کیں اور مین آف دی میچ رہے۔
