دبئی۔8 اکٹوبر (سیاست ڈاٹ کام ) پاکستان کی ٹیم آسٹریلیا کے خلاف پہلے ٹسٹ میچ کی پہلی اننگز میں 482 رنز بنا کر آؤٹ ہو گئی۔ دوسرے دن کھیل کے اختتام تک آسٹریلیا نے اوپنرس کی بدولت بغیر کسی وکٹ کے 30 رنز بنالئے۔ آرون فنچ 13 رنز اور عثمان خواجہ 17 رنز بنا کر ناٹ آوٹ رہے۔ دبئی میں کھیلے جا رہے میچ کے دوسرے دن پاکستان نے 255 رنز 3 کھلاڑی آؤٹ سے اپنی پہلی نامکمل اننگز دوبارہ شروع کی تو محمد عباس گزشتہ روز کے اسکور میں کسی اضافے کے بغیر ہی صرف ایک رن پر پیٹر سیڈل کی گیند پر بولڈ ہوگئے۔اس کے بعد حارث سہیل اور اسد شفیق نے ذمہ دارانہ کھیل کا مظاہرہ کیا اور 150 رنز کی شراکت قائم کرکے ٹیم کا اسکور 400 رنز تک پہنچا دیا، لیکن 410 کے مجموعے پر اسد شفیق 80 رنز بنانے کے بعد مارنس لبوشین کی گیند پر آؤٹ ہوگئے۔اسد شفیق کے بعد حارث سہیل کا ساتھ دینے نوجوان بیٹسمین بابر اعظم آئے لیکن 4 کے انفرادی اسکور پر رن آؤٹ ہوئے تاہم اس دوران دوسرے سرے پر موجود حارث سہیل نے ٹسٹ کرکٹ میں اپنی پہلی سنچری اسکور کی۔حارث سہیل 110 رنز بنانے کے بعد 456 رنز کے مجموعے پر نیتھن لیون کا شکار بنے، تاہم اس کے بعد کوئی بھی بیٹسمن وکٹ پر رک کر نہیں کھیل سکا۔کپتان سرفراز احمد 15رنز بنا کر رن آؤٹ ہوئے جبکہ پہلا میچ کھیلنے والے بلال آصف کی اننگز بھی 12رنز پر تمام ہوئی۔ مچل اسٹارک نے یاسر شاہ کو وکٹوں کے پیچھے کیچ کرا کر اننگز کی واحد وکٹ حاصل کرنے کے ساتھ ساتھ پاکستان کی اننگز کا بھی 482 رنز پر اختتام کردیا۔آسٹریلیا کی جانب سے پیٹر سیڈل 3 وکٹیں لے کر سب سے کامیاب بولر رہے جبکہ نیتھن لیون دو وکٹیں لینے میں کامیاب رہے۔اس سے قبل کھیل کے پہلے روز 2 سال بعد ٹسٹ ٹیم کا حصہ بننے والے محمد حفیظ کی شاندار سنچری اور امام الحق کے ساتھ 205 رنز کی اوپننگ شراکت نے پاکستانی اننگز کو ایک مستحکم بنیاد فراہم کی تھی۔ پاکستان کی پہلی وکٹ 205 رنز پر گری جب اوپنر امام الحق 76 رنز بناکر لیون کا نشانہ بنے، جس کے بعد ٹیم کے مجموعے میں محض 16 رنز کا اضافہ ہوا تھا کہ 222 کے مجموعی اسکور پر اوپنر محمد حفیظ 126 رنز کی عمدہ اننگز کھیل کر پیٹر سڈل کے ہاتھوں ایل بی ڈبلیو ہوگئے۔
تیسرے نمبر اظہر علی وکٹ پر آتے ہی پریشان نظر آئے، انہوں نے نہایت سست رفتاری سے بیٹنگ کی اور 80 گیندوں پر محض 18 رنز بناکر جون ہولینڈ کی گیند پر ایل بی ڈبلیو ہوگئے۔
