کراچی ۔27اگسٹ (سیاست ڈاٹ کام )پاکستانی ٹیم کے نوجوان اوپنرفخر زمان پاکستان کو ورلڈکپ 2019 کے لیے پسندیدہ ٹیم قرار دیتے ہوئے کہا ہے کہ پاکستانی ٹیم آئندہ سال ہونے والے ورلڈکپ کے لیے مکمل طور پر تیار اور بہترین کھلاڑیوں سے پرمشتمل ہے۔اسکائی اسپورٹس کو دیے گئے ایک انٹرویو میں فخر زمان نے کہا کہ میں محسوس کرتا ہوں کہ پاکستان کو ورلڈ کپ کے لیے پسندیدہ ٹیم قرار دیا جانا درست ہے کیونکہ ہماری ٹیم اس ایونٹ کے لئے مکمل طور پر تیار اوربہترین کھلاڑیوں سے لیس ہے۔25سالہ کرکٹر کا ماننا ہے کہ چیمپیئنز ٹرافی میں ٹیم کی حالیہ فتوحات اور تجربہ اسے آئندہ سال ہونے والے ورلڈکپ کے لیے دعویدار بناتا ہے۔انہوں نے کہا کہ پاکستانی ٹیم کا موجودہ امتزاج شاندار ہے اور ہم نے حال ہی میں جو نتائج دیے ہیں وہ اس کا ثبوت ہیں۔حال ہی میں ونڈے کرکٹ میں تیز ترین ایک ہزار رنز مکمل کرنے کا عالمی ریکارڈ بنانے والے فخر نے کہا کہ اس وقت ہماری توجہ ورلڈ کپ پر نہیں آئندہ ماہ ایشیا کپ پر ہے اور میری بھی پوری توجہ ایونٹ میں عمدہ کارکردگی دکھانے پر مرکوز ہے۔یقیناً ورلڈ کپ ایک اہم ایونٹ ہے لیکن میرے لیے اس کی منصوبہ بندی کرنا قبل از وقت ہے کیونکہ اس سے قبل بھی کئی اہم مقابلے مقررہیں۔ایشیا کپ کا آغاز آئندہ ماہ متحدہ عرب امارات میں ہو گا جس میں دفاعی چمپیئن ہندوستان، پاکستان، سری لنکا، بنگلہ دیش، افغانستان اور ایک کوالیفائر ٹیم شرکت کرے گی۔فخرنے کہا کہ ونڈے کرکٹ میں تیز ترین ہزار رنز کا سنگ میل عبور کرنے پر میں بہت خوش ہوں بلکہ مجھے اس بات پر بھی فخر ہے کہ میں نے جو ریکارڈ توڑا وہ اس سے قبل عظیم بیٹسمین سر ویوین رچرڈز کے نام تھا۔اپنی ڈبل سنچری کے حوالے سے سوال پر کہا کہ کپتان سرفراز احمد اورکوچ مکی آرتھر ہمیشہ مجھ سے کہتے تھے کہ مجھ میں ڈبل سنچری اسکور کرنے کی صلاحیت موجود ہے لیکن میں سوچتا کہ وہ میرا اعتماد بڑھانے کی کوشش کر رہے ہیں۔چوتھے ونڈے میں سنچری اسکور کرنے کے بعد میں نے زیادہ سے زیادہ رنز بنانے کے لئے تیز کھیلنا شروع کردیا لیکن جب میرا اسکور 170 تک پہنچ گیا تو سرفراز اورآرتھر نے پیغام بھجوایا کہ ابھی کافی اوورباقی ہیں لہٰذا جوکھم نہ لیتے ہوئے ڈبل سنچری مکمل کروجس کے بعد میں نے محتاط انداز اپناتے ہوئے ڈبل سنچری تک رسائی حاصل کی۔
