کراچی ۔8 جون(سیاست ڈاٹ کام) پاکستان اور ایمریٹس کرکٹ بورڈ کے درمیان معاملات کشیدہ صورتحال اختیار کرتے جارہے ہیں اور پاکستان نے اکتوبر تا مارچ متحدہ عرب امارات میں کسی بھی قسم کی لیگ کرکٹ کے انعقاد پر اپنی کرکٹ ملائیشیا منتقل کرنے کا اشارہ دے دیا ہے۔متحدہ عرب امارات میں مقامی کرکٹ بورڈ کے زیراہتمام رواں سال کی آخری سہ ماہی میں متعدد ٹی20 لیگز کے انعقاد کا انکشاف ہوا جس پر پاکستان کرکٹ بورڈ(پی سی بی) نے گہری تشویش کا اظہار کیا کیونکہ پاکستان کی اس عرصے میں نیوزی لینڈ اور آسٹریلیا سے سیریز مقرر ہیں ۔ایمریٹس کرکٹ بورڈ کی جانب سے اپنی ٹی ٹوئنٹی لیگ کروانے کے اعلان کے بعد پاکستان کرکٹ بورڈ کے چیئرمین نجم سیٹھی نے ایمریٹس کرکٹ بورڈ کے سربراہ کو فون کر کے باضابطہ طور پر اپنے خدشات سے آگاہ کردیا ہے۔پی سی بی نے امارات کرکٹ بورڈ کے سربراہ سے مطالبہ کیا وہ اکتوبر سے مارچ تک لیگ منعقد نہ کروائیں بصورت دیگر پاکستان پلان بی کے طور پر آسٹریلیا اور نیوزی لینڈ سے ہوم سیریز اور پی ایس ایل کا انعقاد ملائیشیا میں کر سکتا ہے۔پی سی بی کے مصدقہ ذرائع کے مطابق نجم سیٹھی نے ایمریٹس کرکٹ بورڈ کو واضح کردیا کہ اگر پاکستان کی ہوم سیریز اور پی ایس ایل سے کچھ دن قبل تک بھی متحدہ عرب امارات میں دوسری لیگز منعقد ہوئیں تو پی سی بی اپنی تمام کرکٹ ملائیشیا منتقل کردے گا۔ذرائع کے مطابق دونوں کرکٹ بورڈ معاملے کے حل کے لیے سنجیدہ ہیں لیکن کچھ نکات پر اتفاق نہیں ہوسکا۔امارات کرکٹ بورڈ رواں سال 3ٹی20 لیگز ایمریٹس لیگ، افغان لیگ اور ٹی ٹوئنٹی لیگ کا انعقاد چاہتا ہے۔پی سی بی نے اپنے مطالبات پیش کرتے ہوئے واضح کردیا کہ پی ایس ایل سے 35 دن قبل اگر امارات میں کوئی کرکٹ منعقد ہوئی تو پاکستان کی تمام ہوم سیریز ملائیشیا منتقل کردیں ۔
