کولمبو۔11 جون (سیاست ڈاٹ کام ) سری لنکا نے پاکستان کے خلاف تین ٹسٹ مقابلوں کی گھریلو سیریز کے لئے 16 رکنی ٹیم کا اعلان کردیا ہے۔اسکواڈ میں سب سے حیران کن شمولیت ز جیہان مبارک ہے جن کی 8 سال کے طویل عرصے کے بعد ٹیم میں واپسی ہوئی ہے، مبارک نے آخری ٹسٹ میچ 2007 میں کھیلا تھا۔اس کے علاوہ اسکواڈ میں تین نئے کھلاڑیوں کو شامل کیا گیا ہے جن میں آف اسپنر تھندو کشال، فاسٹ بولر دشمانتھا چمیرا اور متعدد ونڈے کھیلنے والے کشال پریرا کو شامل کیا گیا ہے۔سری لنکا نے زخمی سورنگا لکمل کو بھی اسکواڈ کا حصہ بنایا ہے لیکن ٹسٹ مقابلوں میں ان کی شمولیت کا انحصار فٹنس ٹسٹ کامیاب کرنے پر ہو گا۔سری لنکا کی ٹیم پاکستان کے خلاف تین ٹسٹ میچوں پر مشتمل سیریز کھیلے گی جس کا آغاز 17 جون کو گال میں ہو گا جس کے بعد دوسرا اور تیسرا ٹسٹ میچ بالترتیب کولمبو اور پالے کیلی میں ہو گا۔دریں اثناء پاکستانی ٹیم کے کوچ وقار یونس نے پراعتماد ہیں کہ ٹیم دورہ سری لنکا کے دوران ٹسٹ اور ونڈے سیریز میں مقررہ اہداف حاصل کر لے گی۔پاکستانی ٹیم اپنے 53 روزہ دورہ سری لنکا میں تین ٹسٹ میچوں کے بعد پانچ ونڈے اور دو ٹوئنٹی20 میچوں پر مشتمل سیریز بھی کھیلے گی جہاں وہ ونڈے سیریز میں کامیابی حاصل کر کے 2017 کی چیمپیئنز ٹرافی کیلئے کوالیفائی کرنے کیلئے پرعزم ہے۔پاکستان اس وقت ونڈے ٹیموں کی عالمی درجہ بندی میں نویں نمبر پر موجود ہے اور اسے چیمپیئنز ٹرافی میں کوالیفائی کرنے کیلئے سری لنکا کے خلاف سیریز میں لازمی فتح درکار ہے تاکہ وہ 30 ستمبر سے قبل عالمی درجہ بندی میں آٹھویں یا اس سے بہتر مقام پر آسکے۔
