ایڈیلیڈ، 17 مارچ (سیاست ڈاٹ کام) ورلڈ کپ جیت کیلئے پسندیدہ آسٹریلیا نے پاکستان کو ورلڈ کپ کوارٹر فائنل میں زیر کرنے کیلئے منصوبہ تیار کر لیا ہے اور شاہینوں کو فیلڈنگ کے جال میں پھنسانے کی حکمت عملی تیار کی ہے۔ چار مرتبہ کی ورلڈ چمپئن آسٹریلیا کو امید ہے کہ وہ اپنی فیلڈنگ کے ذریعے میچ میں فرق پیدا کریںگے۔ مشہور اردو روزنامہ کے مطابق آسٹریلیا نے ایڈیلیڈ کے ہوٹل میں اپنے کھلاڑیوں کیلئے ایک سیشن کا انعقاد کیا جس میں کھلاڑیوں کو ماضی کے عظیم کھلاڑیوں کی غیر معمولی فیلڈنگ کی جھلکیاں دکھائیں اور انہیں بتایا گیا کہ آپ سے پہلے یہی آسٹریلیا کے ٹیم کے ہیرو تھے۔ آسٹریلیا کے فیلڈنگ کوچ گریگ بلیوٹ نے کل میڈیا سے بات چیت کرتے ہوئے دعویٰ کیا ہے کہ ہماری ٹیم اپنی پھرتیلی فیلڈنگ سے پاکستان کو حیران کردے گی، دونوں ٹیموں کے درمیان فرق فیلڈنگ کا ہے اور ہمیں اپنی فیلڈنگ کی وجہ سے کچھ برتری حاصل ہے۔ ماضی کے آسٹریلیائی اوپنر نے کہا کہ ڈارن لیمن جب سے آسٹریلیا کے ہیڈ کوچ بنے ہیں ان کی اولین ترجیح فیلڈنگ کے معیار کو عالمی معیاری اور مثالی بنانا ہے۔ آسٹریلیا کی جانب سے 46 ٹسٹ اور 32 ونڈے انٹرنیشنل کھیلنے والے بلیوٹ نے کہا کہ اس وقت ہمارے خیال سے نیوزی لینڈ اور جنوبی افریقہ کی فیلڈنگ سب سے اعلیٰ ہے، ہمیں احساس ہے، اس لئے ہم ان ملکوں کے قریب ہیں۔ انہوں نے کہا کہ ہر ٹیم کو فیلڈنگ کا احساس ہے، خاص طور پر اب جبکہ ناک آؤٹ مرحلہ شروع ہورہا ہے، اس لئے اب غلطی کی بالکل بھی گنجائش باقی نہیں رہ جاتی۔
