ابوظہبی ۔17ستمبر (سیاست ڈاٹ کام) ایشیا کپ میں پاکستان نے اپنے پہلے مقابلے میں ہانگ کانگ کو 8 وکٹوں سے شکست دیک کر ایونٹ میں پہلی کامیابی حاصل کر لی۔ میچ میں بہترین بولنگ ، ایک اوور میں 3 وکٹیں حاصل کرنے والے عثمان خان شنواری مین آف دی میچ قرار پائے گئے۔عثمان شنواری نے یہ تینوں وکٹیں 31ویں اوور میں حاصل کیں دبئی میں کھیلے گئے ایونٹ کے دوسرے اور گروپ اے کے پہلے میچ میں پاکستان نے حریف ہانگ کانگ ٹیم کی جانب سے دیے گئے 117رنز کا آسان ہدف 23.4 اوورز میں 2 وکٹ کے نقصان پر حاصل کرلیا۔ امام الحق50،بابر اعظم 33 اور فخر زمان 24رنز بنا کر نمایاں رہے تاہم ہانگ کانگ بولرز کی جانب سے احسن خان نے 2 وکٹیں حاصل کیں۔میچ میں بابر اعظم نے کیریئر کے 45 ویں میچ میں 2 ہزار رنز بنانے کا کارنامہ انجام دیا وہ تیز ترین 2 ہزاررنز اسکور کرنے والے پاکستان کے دوسرے بیٹسمین بن گئے جبکہ ان سے پہلے 45 اننگز میں 2ہزار رنز بنانے کا اعزازصرف پاکستانی کرکٹ لیجنڈ ظہیر عباس کے پاس تھا۔ دبئی میں ایونٹ کے دوسرے میچ میں کمزور ہانگ کانگ ٹیم نے پاکستان کے خلاف ٹاس جیت کر پہلے بیٹنگ کا فیصلہ کیا جو بلکل ان کے حق میں نہیں گیا۔پاکستانی بولروں کی تباہ کن بولنگ کے سامنے ہانگ کانگ کے بیٹسمینوں بے بس رہے اور پوری ٹیم صرف 116رنز کے اسکور پر پویلین لوٹ گئی۔واضح رہے پاکستان کا اگلا میچ روایتی حریف ہندوستان سے 19 ستمبر کو جبکہ اس سے پہلے ہندوستان ایونٹ میں اپنے پہلا میچ ہانگ کانگ سے 18ستمبر کو کھیلے گا۔
