ابو ظہبی۔19 اکٹوبر (سیاست ڈاٹ کام) پاکستان نے ابوظہبی ٹسٹ میں شاندار کھیل کا مظاہرہ کرتے ہوئے آسٹریلیا کو 373 رنز کے بھاری فرق سے شکست دے کر میچ اور سیریز 1-0سے اپنے نام کرلی۔ دوسرے ٹسٹ میں پاکستانی ٹیم کا موقف پہلے دن سے ہی مستحکم نظر آیا اور محمد عباس کی شانداد بولنگ کی بدولت اس نے آسٹریلیا کو بہ آسانی شکست دی۔ دوسری اننگز میں آسٹریلیا کی پوری ٹیم 49.4 اوور میں 164 رنز بنا کر آوٹ ہوئی۔عباس نے پہلی اور دوسری اننگز میں فی کس 5 وکٹیں حاصل کرکے ٹسٹ میں مجموعی طور پر اپنی 10 وکٹیں حاصل کی اور مین آف دی میچ کے علاوہ مین آف دی سیریز کا بھی اعزاز اپنے نام کیا۔ عباس 12 سال بعد مقابلے میں 10 وکٹیں حاصل کرنے والے بولر بنے۔گزشتہ روز آسٹریلیا نے پاکستان کی جانب سے کامیابی کیلئے دیئے گئے 538 رنز کے ہدف کے تعاقب میں ایک وکٹ کے نقصان پر 47 رنز بنائے تھے۔ کھیل کے چوتھے دن ارون فنچ 24 اور ٹریوس ہیڈ نے 17 رنز سے نامکمل اننگز کا آغاز کیا تو محمد عباس نے 36 رنز بنانے والے ٹریوس ہیڈ اور ان کے بعد آنے والے مارش کو 5 رنز بنانے کے بعد پویلین بھیج دیا۔ لیگ اسپنر یاسر شاہ نے 28 رنز پر کھیل رہے مچل اسٹارک اور 3 رنز بنانے والے پیٹر سیڈل کی وکٹ حاصل کی۔ آسٹریلیا کی آٹھویں وکٹ عباس کے حصے میں آئی جب انہوں نے 43 رنز پر کھیل رہے لیبز چینج کو ایل بی ڈبلیو آؤٹ کیا۔ اس کے بعد عباس نے آسٹریلیائی اوپنر ایرون فنچ کو 31 اور کپتان ٹم پین کو صفر کے اسکور پر پویلین کی راہ دکھا کر دوسری اننگز میں بھی اپنی 5 وکٹیں مکمل کیں۔ آسٹریلیا کی نویں وکٹ یاسر شاہ نے حاصل کی، اننگز میں انہوں نے مجموعی طور پر 45 رنز دے کر 4 کھلاڑیوں کو آؤٹ کیا۔آسٹریلیا کے دوسرے اوپنر عثمان خواجہ زخمی ہونے کے باعث بیٹنگ کے لئے نہیں آسکے۔ واضح رہے کہ گزشتہ روز میزبان ٹیم نے 9 وکٹوں کے نقصان پر 400 رنز بنانے کے بعد اننگز ختم کرنے کا اعلان کر دیا تھا جس کے بعد آسٹریلیا کو کامیابی کے لیے 538 رنز کا ہدف دیا۔ ٹسٹ کی پہلی اننگز میں پاکستان نے فخر زمان اور سرفراز احمد کے فی کس 94 رنز کی اننگز کی بدولت 282 رنز بنائے تھے جس کے جواب میں آسٹریلیائی ٹیم اپنی پہلی اننگز میں 145 رنز پر آؤٹ ہو گئی تھی اور اس طرح ان کا پہلی اننگز کا خسارہ 137 ہو گیا تھا۔
