لاہور ۔ 3 جولائی ۔ ( سیاست ڈاٹ کام ) سری لنکا کے خلاف ون ڈے سیریز کیلئے پاکستانی ٹیم کے 16 رکنی اسکواڈ کا اعلان کر دیا گیا ہے۔ پی سی بی اعلامیے کے مطابق ونڈے ٹیم کی قیادت اظہر علی کریں گے جبکہ سرفراز احمد وکٹ کیپر ہوں گے۔ان فٹ وہاب ریاض اور حارث سہیل ٹیم سے باہر ہوگئے جبکہ مڈل آرڈر بلے باز عمر اکمل بھی ٹیم میں جگہ نہیں بنا سکے۔نوجوان بلے باز صہیب مقصود بھی زخمی ہونے کے باعث ٹیم کا حصہ نہیں بن سکے۔چیف سلیکٹر ہارون رشید کے مطابق وہاب ریاض اگر فٹ ہو گئے تو انہیں سیریز کے آخری دو میچز کے لئے سری لنکا بھیجا جا سکتا ہے۔رواں ماہ شروع ہونے والی سیریز کیلئے محمد عرفان کو بھی ٹیم میں شامل کیا گیا ہے۔دیگر کھلاڑیوں میں احمد شہزاد، محمد حفیظ، مختار احمد، اسد شفیق، شعیب ملک، محمد رضوان، بابر اعظم ، یاسر شاہ، بلال آصف، عماد وسیم، انور علی، محمد عرفان، احسان عادل اور راحت علی ونڈے ٹیم کا حصہ ہیں۔پانچ ایک روزہ میچز کی سیریز 11 سے 26 جولائی تک کھیلی جائے گی۔
