کراچی ۔13اپریل (سیاست ڈاٹ کام ) ورلڈ کپ کے لئے انگلینڈ روانگی سے قبل پاکستان کرکٹ ٹیم کے شیڈول کا اعلان کردیا گیا ہے جہاں ٹیم ورلڈ کپ 2019 کے لئے 23 اپریل کو روانہ ہو گی۔ پاکستان کرکٹ بورڈ نے ورلڈ کپ سے قبل 13 تا 22 اپریل تک ٹیم کی تیاریوں کے شیڈول کا اعلان کردیا ہے۔15اپریل کو ورلڈ کپ کے 22ممکنہ کھلاڑیوں کے فٹنس ٹسٹ قذافی اسٹیڈیم میں لیے جائیں گے جبکہ 16 اور 17اپریل کو وہ 22ممکنہ کھلاڑیوں میں شرکت کریں گے۔ پھر18اپریل کو شام ساڑھے 5 بجے چیئرمین سلیکشن کمیٹی انضمام الحق ورلڈ کپ سمیت دورہ انگلینڈ کے لیے 15رکنی ٹیم کا اعلان کریں گے جبکہ انگلینڈ کی سیریز کے لیے دو محفوظ کھلاڑیوں کے ناموں کا بھی اعلان کیا جائے گا۔ ورلڈ کپ کے لئے معلنہ ٹیم کا ٹریننگ سیشن 20 اپریل کو لاہور کے قذافی اسٹیڈیم میں ہو گا۔ ورلڈ کپ کے لیے پاکستان ٹیم 24مئی کو افغانستان کے خلاف وارم میچ سے تیاریوں کو حتمی شکل دے گی جس کے بعد ویسٹ انڈیز کے خلاف بھی ایک میچ کھیلا جائے گا۔ پاکستانی ٹیم ورلڈکپ میں اپنا پہلا میچ 31 مئی کو ویسٹ انڈیز کے خلاف کھیلے گی جس کے بعد 3جون کو انگلینڈ کے خلاف میدان میں اترے گی۔ پاکستان اور روایتی حریف ہندوستان کا مقابلہ 16جون کو ہوگا جس کے بعد جنوبی افریقہ اور نیوزی لینڈ سے میچ بالترتیب 23 اور 26 جون کو ہوگا۔
