نئی دہلی۔ 19 فروری (سیاست ڈاٹ کام) صدرجمہوریہ پرنب مکرجی پیر کے دن پارلیمنٹ کے مشترکہ اجلاس سے خطاب کریں گے جس کی منظوری آج مرکزی کابینہ نے دے دی۔ یہ خطاب وزیراعظم نریندر مودی کی سب کو ساتھ لے کر ترقی کرنے کی پالیسی کا نچوڑ ہوگا۔ اس میں این ڈی اے حکومت کے سماجی، معاشی ایجنڈے کی عکاسی بھی کی جائے گی۔ کابینہ کے اجلاس میں صدر کے خطاب کو منظوری دینے کے علاوہ دیگر اہم فیصلے کئے گئے ۔ یہ اجلاس 2 گھنٹے طویل تھا۔صدرجمہوریہ کی تقریر ، حکومت کی پالیسی کا خاکہ پیش کرے گی۔ کابینہ میں اس تقریر کی ہر سطر پر غور کرکے تبادلہ خیال کے بعد اس کو قطعیت دی گئی ۔صدر کے خطاب میں حکومت کی پالیسیوں برائے اُمور خارجہ ، صیانت و معیشت کی عکاسی کی جائے گی۔
