کراچی۔26 اکٹوبر(سیاست ڈاٹ کام) پاکستان کرکٹ بورڈ(پی سی بی) نے کئی ہفتوں تک سوچ بچار کے بعد اپنی ٹیم کے کھلاڑیوں کو ٹی10 لیگ کے دوسرے ایڈیشن کے لیے این او سی جاری کرنے پر رضامندی ظاہر کردی ہے۔ پاکستان کرکٹ بورڈ کے چیئرمین احسان مانی نے ٹی10 لیگ کی ملکیت اور اسپانسر شپ پر تحفظات کا اظہار کرتے ہوئے کھلاڑیوں کو لیگ کے لیے اجازت دینے سے انکار کردیا تھا لیکن انٹرنیشنل کرکٹ کونسل(آئی سی سی) اور امارات کرکٹ بورڈ سے مشاورت کے بعد بورڈ نے کھلاڑیوں کو لیگ کے دوسرے ایڈیشن میں شرکت کی اجازت دی۔ ٹی10 لیگ کے دوسرے ایڈیشن کے لیے پاکستان کے 17کھلاڑیوں کا انتخاب کیا گیا تھا لیکن نیوزی لینڈ سے ٹسٹ سیریز سے ٹکراؤ کے سبب تمام کھلاڑیوں کو این او سی جاری نہیں کیا جائے گا اور صرف انہی کھلاڑیوں کو لیگ کھیلنے کی اجازت ہو گی جن کو ٹسٹ سیریز کے لیے منتخب نہیں کیا جائے گا۔ ٹی10 لیگ میں چار ہندوستانی سابق کھلاڑیوں سے بھی معاہدہ کیا ہے جس میں ظہیر خان، پروین کمار، ایس بدری ناتھ اور میچ ریفری ریتندر سودھی شامل ہیں۔ دیگر اہم کھلاڑیوں میں کرس گیل، شین واٹسن، راشد خان، شاہد آفریدی، آندرے رسل، انگلینڈ کے کپتان ایان مورگن شامل ہیں۔گزشتہ سال چھ ٹیموں کے ایونٹ میں کیرالہ کنگز کی ٹیم چمپیئن رہی تھی لیکن اس سال ٹی10 لیگ میں دو ٹیموں کا اضافہ کیا گیا ہے جس سے ایونٹ میں ٹیموں کی تعداد 8 ہو گئی ہے اور رواں سال 12 دنوں میں 28میچز کھیلے جائیں گے۔
