کولکتہ۔27 اپریل (سیاست ڈاٹ کام )آئی سی سی نے تمام 104 رکن ممالک کے ٹونٹی20 مقابلوں کو بین الاقوامی درجہ دیتے ہوئے امید ظاہر کی ہے کہ 2028 کے لاس اینجلس اولمپکس گیمز میں کرکٹ کو دوبارہ اولمپکس کا حصہ بنا لیا جائے گا۔کولکتہ میں آئی سی سی بورڈ کے 5 روزہ اجلاس کے دوران ورلڈ گورننگ باڈی کی جانب سے انتہائی اہم پیشرفت سامنے آئی جس کے تحت آئی سی سی سی نے اپنے تمام رکن ممالک کو ٹی ٹوئنٹی درجہ دے دیا ہے اور اب تمام رکن ملکوں کی ٹیمیں بین الاقوامی ٹی20 میچز کھیلنے کی اہل ہوں گی جبکہ اس کے علاوہ اس فارمیٹ کی عالمی درجہ بندی متعارف کروانے کی بھی منصوبہ بندی کی جا رہی ہے۔آئی سی سی کی طرف سے جاری کردہ بیان کے مطابق بین الاقوامی سطح پر کرکٹ کو فروغ دینے کے لیے یہ فیصلہ کیا گیا تاکہ تمام ٹیمیں پائیدار اور موثر انداز سے کرکٹ کھیل سکیں۔اس سلسلے میں رواں برس یکم جولائی سے تمام رکن ممالک کی ویمنز ٹیموں کو ٹی ٹونٹی انٹرنیشنل کرکٹ کھیلنے کی اجازت مل جائے گی جبکہ یکم جنوری 2019 سے تمام رکن ممالک کی مینز ٹیمیں بھی مختصر فارمیٹ میں بین الاقوامی کرکٹ کھیلنے کی اہل ہو جائیں گی۔ آئی سی سی نے امید ظاہر کی ہے کہ 2028 میں مجوزہ لاس اینجلس اولمپکس گیمز میں کرکٹ کی دوبارہ واپسی ہو جائے گی۔آخری مرتبہ 1900 میں منعقدہ پیرس اولمپکس گیمز میں کرکٹ کے مقابلے ہوئے تھے اور اس کے بعد اولمپکس گیمز میں کرکٹ نہیں کھیلا جاتا لیکن ورلڈ گورننگ باڈی اب دوبارہ اس کھیل کو گیمز میں شامل کرنے کے لیے کوشاں ہے۔آئی سی سی چیف ایگزیکٹو ڈیو رچرڈسن نے میڈیا سے بات چیت کرتے ہوئے کہا کہ کرکٹ کو دوبارہ اولمپکس گیمز میں شامل کرنا ہماری دیرینہ خواہش ہے، 2024 میں پیرس گیمز کے سلسلے میں نئے کھیلوں کی شمولیت کی قطعی تاریخ گزر گئی ہے لیکن اب ہم نے 2028 گیمز میں کرکٹ کی شمولیت کو نشانہ بنا لیا ہے اور مقصد کے حصول کے لیے ہر ممکن اقدامات کریں گے۔
