بینونی ۔22 ڈسمبر (سیاست ڈاٹ کام ) پاکستان نے امام الحق اور حارث سہیل کی عمدہ بیٹنگ کی بدولت کرکٹ جنوبی افریقہ انوی ٹیشن الیون کو ٹور میچ میں شکست دے کر دورہ جنوبی افریقہ کا کامیابی سے آغاز کیا ہے اور 26 ڈسمبر کو شروع ہونے والے پہلے ٹسٹ سے قبل مہمان ٹیم کے حوصلے بلند ہوئے ہیں۔ بینونی میں کھیلے گئے سہ روزہ میچ میں میزبان ٹیم نے 45 رنز ایک کھلاڑی آؤٹ سے اپنی دوسری نامکمل اننگز دوبارہ شروع کی تو 62 کے مجموعے تک پہنچتے پہنچتے وہ تین وکٹوں سے محروم ہو چکی تھی۔ کپتان مارکس ایکرمین نے نیل برینڈ کے ساتھ مل کر ٹیم کی سنچری مکمل کی لیکن اظہر علی نے بابر اعظم کی مدد سے ایکرمین کی 32 رنز کی اننگز کا خاتمہ کردیا۔ دوسری سرے سے برینڈ نے ذمہ دارانہ بیٹنگ کا سلسلہ جاری رکھتے ہوئے اپنی نصف سنچری مکمل کی اور اونکے نیاکو کے ہمراہ پانچویں وکٹ کے لیے 47رنز جوڑے لیکن اسی اسکور پر برینڈ 71 رنز بنانے کے بعد محمد عامر کی وکٹ بن گئے۔ نیاکو 37 رنز بنانے کے بعد پویلین لوٹے جبکہ 182 کے اسکور پر شاہین شاہ آفریدی نے کائل سمنڈز کی وکٹ حاصل کی تو میزبان ٹیم نے 182رنز 7 کھلاڑی آؤٹ پر اپنی اننگز ڈکلیئر کرنے کا اعلان کردیا اور پاکستان کو کامیابی کے لیے 195 رنز کا ہدف دیا۔ پاکستان کی جانب سے محمد عامر تین وکٹیں لے کر سب سے کامیاب بولر رہے۔ پاکستان نے ہدف کا تعاقب شروع کیا تو اوپنرز شان مسعود اور امام الحق نے ٹیم کو 8 اوورز میں 42 رنز کا جارحانہ آغاز فراہم کر کے فتح کی بنیاد رکھی۔ شان مسعود 24 رنز بنا کر آؤٹ ہوئے جبکہ فخر زمان کی اننگز بھی 18 رنز تک محدود رہی لیکن اس کے بعد امام الحق اور حارث سہیل میزبان ٹیم کے خلاف ڈٹ گئے۔ دونوں کھلاڑیوں نے 96رنز کی شراکت قائم کر کے پاکستان کو فتح کی دہلیز تک پہنچا دیا خصوصاً حارث سہیل کا انداز جارحانہ تھا جنہوں نے تمام میزبان بولروںکے خلاف بہترین اسٹروکس کھیلے۔ اس شراکت کا خاتمہ اس وقت ہوا جب امام الحق 10 چوکوں کی مدد سے 66 رنز بنانے کے بعد پویلین لوٹ گئے جبکہ فہیم اشرف صرف 7رنز بنا سکے۔ لیکن پاکستان کو کامیابی کے حصول میں کوئی دشواری پیش نہ آئی اور اس نے دن کے اختتام سے 8اوورز قبل ہی ہدف حاصل کر کے میچ میں 6 وکٹوں سے کامیابی حاصل کر لی۔ حارث سہیل نے عمدہ بیٹنگ کرتے ہوئے 87 گیندوں پر 10 چوکوں اور دو چھکوں کی مدد سے 73رنز بنائے۔ پاکستان اور جنوبی افریقہ کے درمیان تین ٹسٹ میچوں کی سیریز کا پہلا میچ 26 دسمبر سے سنچورین میں کھیلا جائے گا۔
