ٹرین حادثات میں تین افراد ہلاک

حیدرآباد /12 مارچ ( سیاست نیوز ) شہر میں پیش آئے ٹرین حادثات میں تین افراد ہلاک ہوگئے جن میں دو افراد کی شناخت نہیں ہوپائی ہے ۔ ریلوے پولیس سکندرآباد کے مطابق 40 سالہ رامیش جو پیشہ سے مزدور تھا گوپال پلی گھنڈرہ کا ساکن تھا کل رات گھٹکیسر کے قریب پیش آئے ٹرین حادثہ میں پٹریوں کو عبور کرنے کے دوران ٹرین کی زد میں آکر ہلاک ہوگیا ۔ریلوے پولیس کاچی گوڑہ کے مطابق ملک پیٹ کے قریب پیش آئے ٹرین حادثہ میں پٹریوں کو عبور کرنے کے دوران ایک شحص ٹرین کی زد میں آکر ہلاک ہوگیا ۔ اس شخص کی عمر 35 سال بتائی گئی ہے ۔ ریلوے پولیس کاچی گوڑہ کے مطابق32 سالہ نامعلوم شخص جو شیورامپلی اور بدویل کے درمیان ریلوے لائین کو عبور کرنے کے دوران ایک شخص ہلاک ہوگیا ریلوے پولیس نے مقدمات درج کرلئے ہیں اور مصروف تحقیقات ہے ۔

جہیز ہراسانی کا شکار خواتین کی خودکشی
حیدرآباد /12 مارچ ( سیاست نیوز ) زائد جہیز کے مطالبہ اور اذیت سے تنگ آکر دو خواتین نے خودکشی کرلی ۔ یہ دو علحدہ واقعات سائبرآباد کے پولیس حدود اپل اور کے بی ایچ بی میں پیش آئے ۔ اپل پولیس کے مطابق 32 سالہ مستان بی جو کلیان پوری کالونی اپل کے ساکن میراں ولی کی بیوی تھی ۔ اس خاتون نے کل رات اپنے مکان میں پھانسی لیکر خودکشی کرلی ۔ مستان بی کو شوہر کی ہراسانی کا سامنا تھا اور اس خاتون کا شوہر زائد جہیز کے مطالبہ پر مستان بی کو اذیت دیا کرتا تھا ۔ کوکٹ پلی ہاوزنگ بورڈ پولیس کے مطابق 23 سالہ شالینی جو راجیو گرہا کلپا نظام پیٹ کے ساکن راجیش کی بیوی تھی اس خاتون پر ساس اور شوہر نے چوری کا الزام لگایا تھا اور زائد جہیز کیلئے ہراساں کر رہے تھے ۔ جس سے تنگ آکر خاتون نے کل رات پھانسی لیکر خودکشی کرلی ۔ پولیس نے مقدمے درج کرلئے ہیں اور مصروف تحقیقات ہے ۔