برج ٹاؤن۔18 ستمبر (سیاست ڈاٹ کام) کولن منرو کی جارحانہ بیٹنگ کی بدولت ٹرنباگو نائٹ رائیڈرز نے تیسری مرتبہ کیریبین پریمیئر لیگ کا چمپیئن بننے کا اعزاز حاصل کر لیا۔ٹرینیڈاڈ میں کھیلے گئے کیریبین پریمیئر لیگ کے فائنل میں گیانا ایمیزون واریئرز نے پہلے کھیلتے ہوئے مقررہ اوورز میں 9 وکٹوں پر 147 رنز بنائے۔لیوک رونکی 44 رنز بنا کر نمایاں رہے جبکہ جیسن محمد 24، شیمرون ہٹمیئر 15 رنز بنا کر آؤٹ ہوئے۔ٹرنباگو کے کھاری پیری نے 3 جبکہ ڈیوین براوو نے 2 وکٹیں حاصل کیں۔جوابی اننگز میں ٹرنباگو نائٹ رائیڈرز نے جارحانہ بیٹنگ کا مظاہرہ کرتے ہوئے میچ کو یکطرفہ بنا دیا اور میزبان ٹیم نے مطلوبہ نشانہ 17.3 اوورز میں 2 وکٹوں پر پورا کیا۔کولن منرو نے 39 گیندوں پر 3 چھکوں اور6 چوکوں کی مدد سے 68 رنز کی ناقابل شکست اننگز کھیل کر ٹیم کو کامیابی دلائی جبکہ برینڈن میک کولم 39 رنز کے ساتھ دوسرے نمایاں بیٹسمین رہے۔کھاری پیری کو عمدہ بولنگ پر میچ کا بہترین کھلاڑی قرار دیا گیا جبکہ کولن منرو 567 کے ساتھ ٹورنمنٹ کے بہترین کھلاڑی رہے۔
