ڈھاکہ۔ 23 ڈسمبر (سیاست ڈاٹ کام) ایون لیوس ( 89 رنز )کی جارحانہ بیٹنگ اور کیموپال(5 وکٹ ) کی تباہ کن بالنگ کی بدولت ویسٹ انڈیز نے بنگلہ دیش کو آخری اور فیصلہ کن ٹی ٹوئنٹی انٹرنیشنل کرکٹ میچ میں 50 رنز سے شکست دے کر تین میچوں کی سیریز 2-1 سے جیت لی۔ ویسٹ انڈیز پہلے کھیلتے ہوئے 19.2 اوورز میں 190 رنز بنا کر آؤٹ ہو گئی جس کے جواب میں بنگلہ دیشی ٹیم ہدف کے تعاقب میں 17 اوورز میں 140 رنز پر ڈھیر ہو گئی۔ایون لیوس نے جارحانہ انداز اپناتے ہوئے 36 گیندوں پر 8 چھکوں اور 6 چوکوں کی مدد سے 89 رنز کی طوفانی اننگز کھیلی۔کیموپال کی برق رفتار گیندوں کے سامنے بنگلہ دیش کا کوئی بھی کھلاڑی خاطرخواہ کارکردگی کا مظاہرہ نہ کر سکا۔لٹن داس 43 رنز بنا کر نمایاں رہے جبکہ 7 کھلاڑی دوہرا ہندسہ بھی عبور نہ کر سکے ، لیوس میچ اور شکیب الحسن سیریز کے بہترین کھلاڑی قرار پائے ۔ہفتہ کو کھیلے گئے آخری اور فیصلہ کن ٹی ٹوئنٹی انٹرنیشنل میچ میں بنگلہ دیشی کپتان شکیب الحسن نے ٹاس جیت کر پہلے ویسٹ انڈیز کو بیٹنگ کی دعوت دی تو مہمان ٹیم پہلے کھیلتے ہوئے 19.2 اوورز میں 190 رنز بنا کر آؤٹ ہو گئی، ایون لیوس نے جارحانہ بلے بازی کا مظاہرہ کرتے ہوئے بنگال ٹائیگرز کے بالرز کی خوب درگت بنائی۔انہوں نے 36 گیندوں پر 8 چھکوں اور 6 چوکوں کی مدد سے 89 رنز کی دھواں دار اننگز کھیل کر ٹیم کی پوزیشن مستحکم کی۔نیکولاس پوران 29، شائی ہوپ 23، کیموپال 2، رومان پاویل 19، کپتان کارلوس بریتھویٹ اور فابین ایلن 8، 8، ردرفورڈ 2 جبکہ شمرون ہٹمائر اور اوشین تھامس بغیر کوئی رن بنائے آؤٹ ہوئے ، شکیب الحسن، مستفیض الرحمان اور محموداللہ نے 3،3 کھلاڑیوں کو آؤٹ کیا۔جواب میں بنگلہ دیشی ٹیم مطلوبہ ہدف حاصل کرنے میں ناکام رہی اور پوری ٹیم 17 اوورز میں 140 رنز بنا کر پویلین لوٹ گئی۔کیموپال نے عمدہ بالنگ کا مظاہرہ کرتے ہوئے میزبان ٹیم کے بلے بازوں کی ایک بھی نہ چلنے دی۔لٹن داس کے سوا کوئی بھی بنگلہ دیشی بلے باز ویسٹ انڈین بالرز کا مقابلہ نہ کر سکا۔لٹن داس 43 رنز بنا کر نمایاں رہے جبکہ 7 کھلاڑی دوہرا ہندسہ بھی عبور نہ کر سکے ۔تمیم اقبال 8، سومیہ سرکار 9، محموداللہ 11، مہدی حسن معراج 19، مستفیض الرحمان 8، محمد سیف الدین 5، مشفق الرحیم ایک، کپتان شکیب الحسن اور عارف الحق بغیر کوئی رن بنائے آؤٹ ہوئے ، ابوحیدر 22 رنز بنا کر ناٹ آؤٹ رہے ، کیموپال نے 5 فابین ایلن نے 2 کوٹریل اور بریتھویٹ نے ایک، ایک وکٹ لی۔
