اسلام آباد، 14 اپریل (سیاست ڈاٹ کام) ورلڈ کپ 2015ء کے کوارٹر فائنل میں آسٹریلیا کے خلاف وہاب ریاض کی شاندار بولنگ خصوصاً پہلے اسپل کے کافی چرچے ہوئے اور شائقین کے ذہنوں میں ایک بار پھر وسیم اکرم ، وقار یونس اور شعیب اختر جیسے بولرز کی یاد تازہ ہوگئی۔ اب پاکستانی ٹیم کے منیجر نوید اکرم چیمہ نے وہاب کی جارحانہ بولنگ کے راز سے پردہ اٹھا دیا ہے۔ چیمہ نے انکشاف کیا کہ اس کی وجہ کمنٹیٹرز بنے جنہوں نے کوارٹر فائنل سے قبل پاکستان کو کمزور قرار دیا جس نے وہاب کی پوری ’باڈی لینگویج‘ بدل ڈالی۔ ہند ۔ بنگلہ دیش کوارٹرفائنل میچ میں کمنٹیٹرز نے کہا تھا کہ پاکستان کمزور ٹیم ہے اور اگر اس نے آسٹریلیا کو ہرا دیا تو یہ اپ سٹ ہوگا۔ پاکستانی ٹیم کے منیجر کے مطابق اڈیلیڈ میں جب یہ بات کی گئی تو اس وقت پاکستانی ٹیم کی میٹنگ جاری تھی اور وہاب یہ سن کر جذباتی ہو گئے۔ وہاب نے اس موقع پر کہا کہ ماہرین ہمیں کمزور تصور کر رہے ہیں اور پوری ٹیم کو مشورہ دیا کہ بھرپور جذبے کے ساتھ کھیلیں اور ماہرین کو غلط ثابت کر دیں۔چیمہ نے مزید بتایا کہ کوارٹر فائنل میں وہاب یہی کہہ کر میدان میں اترے تھے کہ آج ہم فاتح بن کر آئیں گے وہاب نے جو کہا وہ کر دکھایا لیکن قسمت کو کچھ اور ہی منظور تھا۔
