نئی دہلی۔13 ڈسمبر(سیاست ڈاٹ کام ) انٹرنیشنل کرکٹ کونسل کے چیف ایگزیکٹیو ڈیو رچرڈسن نے کہا ہے کہ ورلڈ کپ 2019 کرپشن سے پاک ہوگا۔ نئی دہلی میں ایک تشہیری ایونٹ کے دوران میڈیا سے بات چیت کے دوران ڈیو رچرڈسن نے کہاکہ کھیل کو شفاف بنانے کیلئے سخت انتظامات کررہے ہیں، حکومتیں بھی سٹہ بازوںکو جیل کی سلاخوں کے پیچھے بھیجنے کیلئے قانون سازی کریں۔ ہندوستان کے سوا تمام ممالک کرکٹ کو اولمپکس کا حصہ بنانے کے حق میں ہیں۔ خیال رہے کہ آئی سی سی ورلڈ کپ 2019 انگلینڈ میں کھیلا جائے گا۔ حالیہ کچھ عرصے میں ایک مرتبہ پھر کرکٹ میں کرپشن کی وبا تیزی سے پھیلی ہے، اس وقت بھی آئی سی سی اینٹی کرپشن یونٹ کئی مقدمات کی تحقیقات میں مصروف ہے۔ اس سلسلے میں سری لنکا کے سابق اوپنر سنت جے سوریا اور بولنگ کوچ نوان زوئیسا معطل بھی ہوچکے ہیں۔ ڈیو رچرڈسن نے کہاکہ آئی سی سی کا اینٹی کرپشن یونٹ ان افراد کو انگلینڈ کا رخ کرنے سے روکنے کی کوشش کررہا ہے جو کھیل کو آلودہ کرنے کیلئے سفر کرتے ہیں، ہم اس سلسلے میں قانون نافذ کرنے والے اداروں کے ساتھ مل کر کام کررہے ہیں، ہمیں پورا یقین ہے کہ ورلڈ کپ کرپشن سے پاک ثابت ہوگا، ہم اس بات کی بھی کوشش کررہے ہیں کہ مختلف حکومتیں سٹہ بازوں کو جیل میں بھیجنے کیلئے مناسب قانون سازی بھی کریں۔ 59 سالہ سابق جنوبی افریقی وکٹ کیپر رچرڈسن نے مزید کہا کہ ہم کرکٹ کو اولمپکس 2028 کا حصہ بنوانا چاہتے ہیں لیکن یہ کہنا آسان اور کرنا بہت مشکل ہے کیونکہ اس کیلئے انٹرنیشنل اولمپک کمیٹی کو راضی کرنا ہے، کرکٹ کی اولمپکس میں شمولیت کیلیے ہمارے 104 میں سے 103 ارکان حمایت کررہے ہیں صرف ہندوستانی بورڈ کا اپنے ملک کی اولمپک اسوسی ایشن کے ساتھ کچھ مسئلہ ہے لیکن مجھے یقین ہے یہ معاملات بھی جلد حل ہوجائیں گے۔
