نئی دہلی ۔8 اگسٹ(سیاست ڈاٹ کام)انگلینڈ کے خلاف ونڈے سیریز کے تیسرے میچ کے بعد ہندوستانی وکٹ کیپر مہندرسنگھ دھونی کی جانب سے امپائر سے گیند لینے پر جاری کرکٹ حلقوں کی قیاس آرائیوں کا بالآخرخاتمہ ہوگیا۔17 جولائی کو لیڈز کے میدان میں کھیلے گئے میچ میں انگلینڈ کے خلاف شکست کے بعد ٹیم کے سابق کپتان اور وکٹ کیپر دھونی نے امپائر سے گیند مانگ لی تھی جس کے بعد میڈیا میں خبروں کا بازار گرم ہوگیا کہ دھونی کرکٹ کو الوداع کہہ سکتے ہیں ۔اس ساری صورتحال پردھونی نے اپنی خاموشی توڑتے ہوئے انکشاف کیا کہ امپائر سے گیند انہوں نے 2019 کے ورلڈ کپ کی تیاری کے پیش نظر لی تھی۔دھونی نے کہا کہ ہم اصل میں دیکھنا چاہ رہے تھے کہ آخرگیند ریورس سوئنگ کیوں نہیں ہو رہی ہے، ہمیں اگلے سال ورلڈ کپ کھیلنا ہے اور ہم گیند کو دیکھ کر یہ معلوم کرنا چاہ رہے تھے کہ گیند ریورس سوئنگ کیسے ہوگی ؟۔انہوں نے کہا کہ انگلش ٹیم کے بولرز ریورس سوئنگ کر رہے تھے، لیکن ہم اس میں ناکام تھے، ایسے میں سوال کا جواب ڈھونڈنا ضروری تھا، اس لئے میں نے امپائر سے گیند لیکر بولنگ کوچ بھرت ارون کو دیدی۔دھونی نے مزید کہا کہ ہمیں اگلے سال ہونے والے ورلڈ کپ کے پیش نظر ریورس سوئنگ پر کام کرنا ضروری ہے۔تیسرے ونڈے میں ان کی سست بیٹنگ پرکافی تنقید بھی ہوئی ہیں اور کہا جارہا تھا کہ دھونی اپنے کرئیر کا آخری ونڈے کھیل چکے ہیں۔
