لاہور ۔3 اکٹوبر (سیاست ڈاٹ کام ) آئی سی سی ورلڈکپ ٹرافی دو دن کے دورے پرلاہور پہنچ گئی۔کرکٹرمحمد عرفان نے ٹرافی کے ساتھ ٹورازم بس پرشہرکا چکر لگایا۔ سونے اور چاندی سے بنی گیارہ کلووزنی ٹرافی آج صبح لاہور پہنچی ۔ آئی سی سی مارکیٹنگ شعبے کے شمریز شیٹھی اس ٹرافی کے ساتھ آئے ۔ دوپہر ایک بج کر تیس منٹ پر قذافی اسٹیڈیم کے مین داخلی دروازے پر میڈیا کے سامنے کرکٹر محمد عرفان لے کر آئے۔فوٹو سیشن کے بعد ڈھول کی تھاپ پر عرفان ٹرافی لے لاہور شہر کی سیر کے لئے مختص بس پر سوار ہوئے اور گلبرگ، جیل روڈ، کینال روڈ، مال روڈ، بادشاہی مسجد، شاہی قلعہ سے ہوتی ہوئی واپس اسٹیڈیم پہنچی۔ پروگرام کے مطابق جمعرات کو اس ٹرافی کو گورنمنٹ کالج، شوکت خانم اور پھرواہگہ بارڈرلے جایا جائے گا۔ دوسرے مرحلے میں ٹرافی5اور6 اکتوبرکوراولپنڈی میں رہے گی اور 7 اکتوبر کو کراچی پہنچے گی۔ ٹرافی 27 اگست کو آئی سی سی اکیڈمی سے روانہ ہوئی تھی، اسے 21 ملکوں اور60 شہروں کا سفر مکمل کرکے19فروری کوانگلینڈ پہنچنا ہے۔ورلڈ کپ 2019 انگلینڈ میں کھیلا جارہاہے جہاں آسٹریلیا اپنے خطاب کا دفاع کرے گی ۔
