ماسکو۔19 جون (سیاست ڈاٹ کام) فیفا ورلڈ کپ کے پہلے ہفتے میں دلچسپ میچ کھیلے گئے لیکن شائقین کی بڑی تعداد کوغیر متوقع نتائج بھی دیکھنے پڑے۔ افتتاحی میچ میں سعودی عرب کی ٹیم کو 0-5 سے شکست ایک بڑا دھکا تھا ۔ ہار جیت ہر کھیل کا حصہ ہے لیکن اتنے بڑے فرق سے پہلا ہی میچ ہارنے کی توقع نہیں کی جا رہی تھی۔ اسی طرح دفاعی چیمپیئن جرمنی کیلئے بھی آغاز انتہائی غیر متوقع ثابت ہوا جب اسے ابتدائی میچ میں پہلی مرتبہ شکست کا سامنا کرنا پڑا۔فرانس نے اپنے پہلے میچ میں آسٹریلیا کو 1-2 دو گول سے شکست تو دی تاہم اس کیلئے یہ اتنا آسان نہیں تھا۔ دفاعی چیمپیئن جرمنی کو درجہ بندی میں 15ویں نمبر کی ٹیم میکسیکو کے خلاف شکست کا سامنا کرنا پڑا، اس میچ کو ورلڈ کپ میں اب تک کا سب سے بڑا حیران کن نتیجہ کہا جارہا ہے۔ 1982 ء کے بعد یہ پہلا موقع ہے جب جرمنی کو ورلڈ کپ میں اپنے پہلے ہی میچ میں شکست کا سامنا کرنا پڑا جبکہ یہ لگاتار تیسرا ورلڈ کپ ہے جب دفاعی چیمپیئن کو ٹورنمنٹ کے پہلے میچ میں فتح نہ ملی ہو۔ اس سے قبل 2010 میں اٹلی اور پیراگوئے کا میچ برابر رہا تھا جبکہ 2014 ء میں ہالینڈ نے اسپین کو1۔5 سے شکست دی تھی۔ میکسیکو کی جرمنی کے خلاف یہ پہلی کامیابی تھی جبکہ اس نے ورلڈ کپ مقابلوں میں اپنے پہلے میچ میں شکست نہ کھانے کا ریکارڈ بھی برقرار رکھا۔ اب تک6 میں سے5مرتبہ میکسیکو نے اپنے سفر کا آغاز فتح سے کیا ہے جبکہ ایک میچ برابر کھیلا ہے۔ گروپ ای میں برازیل اور سوئٹزرلینڈ کی ٹیموں کے درمیان کھیلا گیا میچ1-1 سے برابر رہا۔یہ 40 برس میں پہلا موقع تھا کہ برازیل کی ٹیم ورلڈ کپ میں اپنا افتتاحی میچ جیتنے میں ناکام رہی۔5مرتبہ کے عالمی چیمپیئن برازیل نے میچ کے ابتدائی لمحات میں ہی فلپ کو ٹینو کے شاندار گول کی بدولت برتری تو حاصل کر لی تھی لیکن وہ اسے برقرار نہ رکھ سکا۔برازیل اسٹار فٹبالر نیمر جونیئر کے ہوتے ہوئے دوسرا گول نہ کرسکی۔ پرتگال، اسپین اور ارجنٹیناکی طرح برازیل کو بھی جیت کا مزہ چکھنے کیلئے آئندہ میچوں کا انتظار کرنا پڑے گا۔
