سڈنی ۔28 اکٹوبر (سیاست ڈاٹ کام ) مخالف کھلاڑی کی بدتمیزی پر وارنر اننگز ادھوری چھوڑ کر میدان سے باہر آگئے ۔ پابندی کا شکارآسٹریلیائی اوپنر ڈیوڈ وارنر انجہانی فلپ ہیوز کے بھائی جیسن ہیوز کی جانب سے لفظی حملوں اور ہتک آمیز جملے کہنے پر میچ ادھورا چھوڑ کر میدان سے باہر چلے گئے۔ یہ واقعہ سڈنی میں گریڈ میچ کے دوران پیش آیا جب وہ اپنے کلب وینڈوک پیٹرشام کے لیے بیٹنگ کر رہے تھے۔کرکٹ آسٹریلیا کے مطابق جس وقت واقعہ پیش آیا اس وقت وارنر 35رنز پر بیٹنگ کر رہے تھے اور مخالف ٹیم کے کھلاڑی کی جانب سے ہتک آمیز جملے ادا کرنے پر میچ ادھورا چھوڑ کر میدان سے باہر چلے گئے۔ وہ مخالف ٹیم کے کھلاڑی کے رویے پر خوش نہیں تھے اور انہوں نے امپائر سے کہا کہ وہ میچ سے دستبردار ہو رہے ہیں لیکن یہ معلوم نہیں ہو سکا کہ انہیں جیسن نے کیا کہا۔ بعدازاں ان کے کلب کے کھلاڑیوں نے تجربہ کار وارنر کو منایا اور انہیں دوبارہ میدان میں جا کر کھیلنے پر راضی کر لیا۔ وارنر نے مخالف ٹیم کے اس رویے کا بدلہ لینے کی ٹھانی اور بیٹنگ سے بھرپور جواب دیتے ہوئے میچ میں سنچری اسکور کی۔ وارنر نے مجموعی طور پر 6گھنٹے بیٹنگ کرتے ہوئے12چوکوں اور 3 چھکوں کی مدد سے 257گیندوں پر 157رنز کی اننگز کھیلی۔ واضح رہے کہ رواں سال جنوبی افریقہ کے خلاف کیپ ٹاؤن میں کھیلے گئے سیریز کے تیسرے ٹسٹ میچ میں آسٹریلیائی کھلاڑی کیمرون بین کرافٹ انٹرنیشنل کرکٹ کونسل کے قوانین کے برخلاف پیلے رنگ کے ٹیپ سے گیند کو رگڑتے ہوئے پکڑے گئے تھے۔ بعدازاں کپتان اسٹیون اسمتھ نے بال ٹیمپرنگ کا اعتراف کرتے ہوئے کہا تھا کہ یہ ہماری ٹیم کی قیادت کا منصوبہ تھا۔ اس واقعہ پر آسٹریلیائی ٹیم کو دنیا بھر کے بشمول اپنے ملک سے بھی شدید تنقید کا سامنا کرنا پڑا اور یہاں تک کہ آسٹریلیائی وزیر اعظم نے اسمتھ کو فوری طور پر قیادت سے ہٹانے کا حکم جاری کیا تھا۔ اسمتھ کو ٹسٹ میچ کے دوران ہی قیادت سے ہٹا کر وکٹ کیپر ٹم پین کو یہ ذمے داری سونپ دی گئی تھی۔ کرکٹ بورڈ نے بال ٹیمپرنگ معاملے پر سابق کپتان اسٹیو اسمتھ اور نائب کپتان ڈیوڈ وارنر پر ایک سال کی پابندی عائد کردی تھی جبکہ بین کرافٹ پر بھی 9ماہ کی پابندی عائد ہوئی۔
