ابوظہبی ۔7 ڈسمبر (سیاست ڈاٹ کام ) پاکستان کے خلاف نیوزی لینڈ نے اپنے گھریلو میدانوں سے باہر 49 برس بعد ٹسٹ سیریز جیت لی ہے جیسا کہ مہمان ٹیم نے تیسرا ٹسٹ 123 رنز سے اپنے نام کرتے ہوئے 3 مقابلوں کی سیریز پر 2-1 سے قبضہ جمالیا ۔ نیوزی لینڈ نے تیسرے اور فیصلہ کن ٹسٹ کے آخری دن 7 وکٹ پر 353 رنز بنانے کے بعد دوسری اننگز ختم کردی اور پاکستان کو کامیابی کیلئے 280 رنز کا نشانہ دیا جس کے جواب میں میزبان ٹیم 156 رنز پر پویلین لوٹ گئی۔ ہدف کے تعاقب میں پاکستانی بیٹسمینوں نے ایک مرتبہ پھر مایوس کن کارکردگی کا مظاہرہ کیا اور صرف 55 رنز پر آدھی ٹیم پویلین واپس لوٹ گئی تھی، ٹسٹ کریئر کا آخری میچ کھیلنے والے محمد حفیظ اپنی آخری اننگز یادگار نہ بناسکے اور صرف 8 رنز پر ہی ٹم ساؤتھی کی گیند پر بولڈ ہوئے۔ پچھلے میچ کے سنچری بنانے والے اظہر علی بھی زیادہ دیر وکٹ پر نہیں رکے اور 5 رنز بنانے کے بعد گرینڈ ہوم کا شکار بنے۔ ان فارم مڈل آرڈر بیٹسمین حارث سہیل بھی امیدوں پر پورا نہ اترسکے اور صرف 9 رنزبنانے کے بعد ہی پویلین واپس لوٹ گئے، حارث کے آؤٹ ہونے کے بعد اگلی ہی گیند پر پہلی اننگز میں سنچری بنانے والے اسد شفیق کھاتہ کھولے بغیر پویلین لوٹ گئے۔اوپنرامام الحق نے کچھ دیر مزاحمت کی لیکن 22 رنز پر ان کی ہمت بھی جواب دے گئی۔ کپتان سرفراز احمد بھی زیادہ دیر وکٹ پر نہ ٹہر سکے اور 28 رنز بناکر ولیم سمر ویل کا شکار بنے۔ بلال آصف اور یاسر شاہ کو ٹم ساؤتھی نے پویلین بھیجا۔ بابراعظم نصف سنچری بنانے والے واحد کھلاڑی رہے، وہ 51 رنز پر اعجاز پٹیل کا شکار بنے۔نیوزی لینڈ کی جانب سے ٹم ساؤتھی ، ولیم سمر ویل اور اعجاز پٹیل نے فی کس3 وکٹیں حاصل کیں۔ اس سے قبل کھیل کے آخری دن نیوزی لینڈ نے اننگز کا آغاز 272 رنز 4 کھلاڑیوں کے نقصان پر کیا تو کین ولیمسن بغیر کسی رن کا اضافہ کیے پویلین لوٹ گئے۔ کین ولیمسن کے 139 رنز پر آؤٹ ہونے کے بعد نکولس نے نیوزی لینڈ کا اسکور آگے بڑھایا اورسنچری اسکور کی، نکولس نے 126 رنز بنائے اور ناقابل شکست رہے۔دوسری جانب لیگ اسپنر یاسر شاہ نے دوسری اننگز میں سومر ولی کو ایل بی ڈبلیو کرکے تیز ترین 200 وکٹیں حاصل کرنے کا 82 سالہ قدیم ریکارڈ توڑا۔ یاسر شاہ نے دوسری اننگز میں 4 اور مجموعی طور پر میچ میں 7 کھلاڑیوں کو پویلین کی راہ دکھائی۔ولیمسن کو مقابلہ اور یاسر شاہ کو سیریز کا بہترین کھلاڑی قراردیا گیا ہے۔
