ابوظہبی ۔22 نومبر (سیاست ڈاٹ کام ) پاکستانی ٹیم کے ہیڈ کوچ مکی آرتھر نے نیوزی لینڈ کے خلاف پہلے ٹسٹ میچ میں4 رنز سے شکست کو اپنے کوچنگ کیریئر کی بدترین شکست قرار دیا ہے۔ ابوظہبی میں کھیلے گئے سیریز کے پہلے ٹسٹ میں پاکستانی ٹیم کی بیٹنگ بدترین ناکامی سے دوچار ہوئی اور130 رنز پر 3 وکٹیں گنوانے والی پوری ٹیم مزید 41 رنز کے اضافے سے 7وکٹیں گنواکر 171 رنز پر ڈھیر ہو گئی۔ کیریئر کا پہلا ٹسٹ کھیلنے والے اعجاز پٹیل نے شیخ زید اسٹیڈیم میں کھیلے گئے میچ کی دوسری اننگز میں عمدہ بولنگ کرتے ہوئے 59رنز کے عوض 5وکٹیں لیں۔ پاکستانی ٹیم کے کوچ مکی آرتھر نے شکست کو تکلیف دہ قرار دیتے ہوئے کہا کہ یہ میرے کیریئر کی بدترین ناکامیوں میں سے ایک ہے۔ ماضی میں جنوبی افریقہ اورآسٹریلیا کی کوچنگ کرنے والے آرتھر نے کہا کہ بحیثیت ہیڈ کوچ مجھ سمیت تمام کھلاڑی اور اسٹاف اس شکست پر افسردہ ہیں اور لیکن ہم اس شکست سے تحریک لینے کی کوشش کریں گے تاکہ دوسرا میچ جیت سکیں۔ نیوزی لینڈ نے ٹسٹ کرکٹ کی پانچویں سب سے کم تر فرق سے فتح کے ساتھ ہی تین میچوں کی سیریز میں بھی 0-1 کی برتری حاصل کر لی۔ پاکستانی ٹیم کے کوچ نے اس تاثر کو مستردکر دیاکہ نشانہ کے تعاقب میں پاکستانی کھلاڑی تن آسانی کا شکار ہو گئے تھے۔ انہوں نے کہا کہ کھلاڑیوں نے ناقابل یقین حد تک اپنی پوری کوشش کی لیکن ہم سب دباؤ میں ٹیم کی اسٹروکس کے انتخاب پر مایوس تھے، ہمیں اس سے سیکھتے ہوئے آگے بڑھنے کی ضرورت ہے۔ اس موقع پر انہوں نے پہلی اننگز میں بھی پاکستانی بیٹسمینوں کی ناقص بیٹنگ کی بھی نشاندہی کی جس کے سبب 153رنز پر نیوزی لینڈ کوآؤٹ کرنے کے باوجود ٹیم صرف 74رنز کی برتری لے سکی۔ انہوں نے کہا کہ ہم نے غلطی کی جس کی وجہ ہمیں چوتھی اننگز میں توقعات سے بڑے نشانہ کا سامنا کرنا پڑا۔ ہم پہلی ہی اننگز میں میچ کو ختم کر سکتے تھے لیکن ہم نے وہ موقع گنوا دیا۔
