ابو ظہبی۔29 اکٹوبر(سیاست ڈاٹ کام) نیوزی لینڈ کی کرکٹ ٹیم نے عالمی نمبر ایک پاکستان کے خلاف ٹوئنٹی20 سیریز کی تیاریاں شروع کر دیں۔ کیوی بیٹنگ کوچ کریگ میک ملن سیریز کو بڑا چیلنج قرار دے رہے ہیں۔ پاکستان کرکٹ ٹیم یواے ای میں نیوزی لینڈ سے مقابلہ کرے گی۔ اس سیریز کے لئے مہمان ٹیم کا ابوظہبی میں کیمپ لگ چکا ہے اور مقابلے کی تیاریوں میں مصروف ہے۔ پاکستان اور نیوزی لینڈ کے درمیان مقابلہ تینوں فارمیٹس میں ہوگا، پہلے مرحلے میں ٹی 20 سیریز کا آغاز ہوگا جس کے میچز 31 اکتوبر ، 2 اور 4 نومبر کو کھیلے جائیں گے۔ نیوزی لینڈ کے بیٹنگ کوچ میک ملن نے کہا کہ پاکستان ٹیم اس وقت ٹوئنٹی20 کی نمبر ون ٹیم ہے جس کا بولنگ شعبہ بہت اچھا ہے۔ بولر ریورس سوئنگ بھی کرتے ہیں اور اسپن بھی ،یو اے ای کی وکٹیں بھی پاکستان ٹیم کو راس آتی ہے اس لئے یہ سیریز ایک بڑا چیلنج ہے۔ میک ملن نے کہا کہ پاکستان اور آسٹریلیا کے میچز دیکھے ہیں۔ پاکستان ٹیم نے شاندار کھیل کا مظاہرہ کیا اور آسٹریلیا جیسی ٹیم کو کلین سویپ کیا لیکن ہم بھی بھر پور مقابلے کیلئے تیار ہیں۔ ایک سوال پر انہوں نے کہا کہ نیوزی لینڈ ٹیم میں بھی ٹوئنٹی20 کرکٹ کے تجربہ کار کرکٹرز شامل ہیں۔ ہماری ٹیم نے 2014ء کی سیریز میں بھی اچھے کھیل کا مظاہرہ کیا تھا ۔
