ملبورن۔یکم اپریل ۔ (سیاست ڈاٹ کام ) انگلش کمنٹیٹر مارک نکولس نے حالیہ ورلڈ کپ فائنل کی تقریب میں شاہدآفریدی اور مصباح الحق کا تذکرہ نہ کرنے پر دونوں کھلاڑیوں اور پاکستانی شائقین سے معافی مانگ لی ہے۔اتوار کے روز ملبورن میں منعقد ہ فائنل کی اختتامی تقریب کے دوران نکولس نے ٹورنمنٹ میں ونڈے کرکٹ سے سبکدوش ہونے والے اسٹار کھلاڑیوں کا ذکر کیا۔ نکولس نے زمبابوے کے برینڈن ٹیلر، سری لنکا کے کمار سنگاکارا اور مہیلا جیا وردھنے کے بعد آسٹریلیا کے مائیکل کلارک اور نیوزی لینڈ کے ڈانیل ویٹوری کو خراج تحسین پیش کیا لیکن پھر حیران کن طور پر مصباح الحق اور شاہد آفریدی کا ذکر کئیبغیر ہی آگے نکل گئے۔تقریب ختم ہوئی اور آسٹریلیا کا جشن شروع ہوا ۔ تاہم پاکستانی مداح نکولس کے رویہ پر شدید نالاں ہوئے اور ٹوئٹر پر نکلولس سے وضاحت طلب کر ڈالی۔تین دن گزرنے کے بعد نکولس نے واضح کیا کہ مصباح اور آفریدی کا ذکر نا کرنا ان کی غلطی نہیں، بلکہ اصل غلطی تقریب کا اسکرپٹ لکھنے والوں کی ہے جو مصباح اور آفریدی کا ذکر کرنا ہی بھول گئے۔
