نئی دہلی ، 29 اپریل (سیاست ڈاٹ کام) سنیل نرائن کیلئے ایک اور جھٹکے والے اقدام میں ویسٹ انڈیز کے کھلاڑی پر انڈین پریمیر لیگ(آئی پی ایل) سمیت انڈین کرکٹ بورڈ(بی سی سی آئی) کے زیر اہتمام تمام مقابلوں میں آف اسپن گیند پھینکنے پر پابندی عائد کردی گئی ہے۔ نرائن کا ایکشن آئی پی ایل کے رواں سیزن میں 22 اپریل کو وشاکاپٹنم میں کولکاتا نائٹ رائیڈرز اور حیدرآباد سن رائزرز کے درمیان میچ میں مشکوک ہونے کی شکایت کی گئی تھی۔ اس کے بعد انہیں کولکاتا نے کسی بھی میچ میں نہیں کھلایا۔ آئی سی سی اور بی سی سی آئی کی جانب سے منظور شدہ لیبارٹری میں ان کے بولنگ ایکشن کا ٹسٹ کیا گیا جس کے بعد کمیٹی نے ان کے بولنگ ایکشن کی فوٹیج دیکھ کر شواہد جمع کئے اور اس نتیجے پر پہنچے کہ نرائن کی آف اسپن گیندوں کا ایکشن غیر قانونی ہے۔ نارائن کی انڈین بورڈ کے زیر اہتمام کسی بھی ایونٹ میں آف اسپن بولنگ کرنے پر پابندی عائد کردی گئی ہے لیکن وہ فنگر اسپن اور سیدھی گیند کر سکتے ہیں۔ یہ پہلا موقع نہیں کہ نرائن کی بولنگ پر پابندی لگی بلکہ اس سے قبل اکتوبر 2014ء میں چمپینس لیگ کے دوران اُن کا ایکشن مشکوک کہا گیا تھا۔ انہیں سیمی فائنل کھیلنے کی اجازت دی گئی ، جہاں امپائرز نے ان کی تمام 24 گیندوں پر شکوک کا اظہار کیا ، جس کے بعد ان پر فائنل میں بولنگ کرنے پر پابندی عائد کردی گئی تھی۔
