سنچورین ۔26 ڈسمبر (سیاست ڈاٹ کام ) پاکستان اور جنوبی افریقہ کے درمیان پہلا ٹسٹ شروع ہوچکا ہے۔ پاکستان کو باکسنگ ڈے ٹسٹ کے پہلے دن دوسرے ہی اوورس میں امام الحق کے طور پر پہلا جھٹکا لگا۔ امام الحق کھاتہ کھولے بغیر ہی پویلین لوٹ گئے۔ انہوں نے 9 گیندوں کا سامنا کیا اور پھر کگیسو ربادا کے شکار بن گئے۔ امام الحق کے صفر پر آوٹ ہونے کے بعد اب ان کا سوشل میڈیا پر جم کر مذاق اڑایا جارہا ہے۔ ساتھ ہی ساتھ ٹیم کے انتخاب پر چیف سلیکٹر انضمام الحق پر بھی انگلیاں اٹھائی جارہی ہیں۔ خیال رہے کہ امام الحق انضما م کے بھتیجے ہیں اور اسی وجہ سے کرکٹ شائقین انضمام الحق پر تنقید کررہے ہیں۔ ایک ٹویٹر صارف نے لکھا کہ امام الحق نہ تو بیٹنگ کرسکتے ہیں ، نہ فیلڈنگ ، وہ انڈر 12 کرکٹ لیگ میں بھی منتخب ہونے کے قابل نہیں ہیں لیکن ان کے چچا کا شکریہ۔ پاکستان کی ٹیم صرف 10 کرکٹر اورایک سفارشی کے ساتھ کھیل رہی ہے۔ علاوہ ازیں گزشتہ روز امام الحق کے سالگرہ کیک کٹائی کا ایک ویڈیو بھی فیس بک پر موضوع بحث بناہواہے جس میں کچھ ساتھی کھلاڑی انہیں مبارک باد دے رہے ہیں جس پر صارفین نے لکھا کہ خوش آمد کرو کیونکہ وہ چیف سلکٹر کا بھتیجا ہے۔ خیال رہے کہ پاکستان کی ٹیم اب تک جنوبی افریقہ میں کوئی ٹسٹ سیریز اپنے نام نہیں کرسکی ہے اورگزشتہ 10 سال کے دوران پاکستان نے میزبان سرزمین پر کوئی ٹسٹ نہیں جیتا ہے۔
