بیونس آئرس۔17 جولائی (سیاست ڈاٹ کام )ارجنٹینا نے روس میں منعقدہ ورلڈ کپ فٹ بال ٹورنمنٹ میں ٹیم کی مایوس کن کارکردگی کے بعد منیجر جارج سمپاؤلی سے باہمی اتفاق سے معاہدہ ختم کر دیا۔2014ء کی رنر اپ ارجنٹیناکی ٹیم نے بمشکل ورلڈ کپ کے لئے کوالیفائی کیا تھا اس لئے عالمی کپ میں اس ٹیم سے شائقین کو کچھ خاص تواقعات وابستہ نہیں تھیں تاہم لیونل میسی کی ٹیم میں موجودگی کی وجہ سے ارجنٹینا کے عوام کو ٹیم سے معجزے کی امید تھی۔کروشیا کے خلاف پہلے مرحلے میں 0-3 سے شکست کے بعد ارجنٹینا نے بمشکل پری کوارٹر فائنل راؤنڈ میں جگہ بنائی لیکن پری کوارٹر فائنل میں فرانس کے خلاف 3-4 سے شکست کے ساتھ ہی ٹیم کا عالمی کپ میں سفر تمام ہوا۔58 سالہ سمپاؤلی نے گزشتہ سال مئی میں بطور مینجر ارجنٹینا ٹیم کا عہدہ سنبھالا تھا اور انہی کے دور میں ارجنٹینا نے میگا ایونٹ تک رسائی کا اعزاز پایا تھا۔ارجنٹینا فٹبال اسوسی ایشن نے سمپاؤلی کو عہدے سے ہٹانے کی تصدیق کرتے ہوئے کہا کہ ہم نے باہمی اتفاق سے یہ فیصلہ کیا اور منیجر کے ساتھ ساتھ فزیکل ٹرینر جارج ڈیسیو اور وڈیو اینالسٹ متھیاس مانا کو بھی ہٹا دیا گیا ہے۔فٹبال اسوسی ایشن نے کہا کہ ہم نئے منیجر کی تقرر میں جلد بازی سے کام نہیں لیں گے اور موزوں شخص کو ہی یہ ذمہ داری دیں گے جس میں چیلنجز کا سامنا کرنے کی صلاحیت ہو۔
