ماسکو۔27 جون (سیاست ڈاٹ کام )فیفا ورلڈ کپ کے اہم میچ میں ارجنٹیناکی ٹیم نے نائجیریا کو سنسنی خیز مقابلے کے بعد 2-1 سے شکست دے کر پری کوارٹر فائنل راؤنڈ کے لیے کوالیفائی کر لیا جبکہ کروشیا نے آئس لینڈ کو شکست دے دی۔سینٹ پیٹرز برگ اسٹیڈیم میں کھیلے گئے گروپ ڈی کے اہم میچ میں ارجنٹینا کو اگلے راؤنڈ میں رسائی کے لیے کامیابی حاصل کرنا ضروری تھا اور اسی وجہ سے میچ کے شروع سے ہی انہوں نے جارحانہ کھیل پیش کیا۔میچ کے 14ویں ہی منٹ میں لیونل میسی نے عمدہ گول کر کے اپنی ٹیم کو برتری دلا دی جبکہ جلد ہی ہگوین کو برتری دگنی کرنے کا نادر موقع ملا لیکن وہ گیند کو جال تک نہ پہنچا سکے۔پہلے ہاف کے اختتام تک ارجنٹینا کو میچ میں برتری حاصل تھی لیکن دوسرے ہاف کے51ویں منٹ میں نائجیریا کو پینالٹی ملی جس پر وکٹر موسز نے گول کر کے مقابلہ برابر کردیا۔دونوں ٹیموں کے درمیان اس کے بعد برتری کے حصول کی رسہ کشی شروع ہوئی خصوصاً ارجنٹینا کی جانب سے حملوں میں تیزی آ گئی لیکن وہ گول اسکور کرنے میں کامیاب نہ ہو سکے۔تاہم میچ ختم ہونے سے چند منٹ قبل 86ویں منٹ میں مارکوس روجو نے شاندار گول کر کے اپنی ٹیم کو میچ میں برتری دلا دی جو فیصلہ کن ثابت ہوئی اور ارجنٹینا نے 2-1 سے فتح حاصل کر کے اگلے راؤنڈ میں جگہ بنا لی۔دوسری جانب روستوو ارینا میں کروشیا اور آئس لینڈ کے درمیان کھیلے گئے میچ کے پہلے ہاف میں مقابلہ بغیر کسی گول کے برابر رہا لیکن دوسرے ہاف میں کروشیا کے میلان بدلیجی نے جمود کو توڑتے ہوئے 53ویں منٹ میں اپنی ٹیم کو برتری دلائی۔میچ کے 76ویں منٹ میں آئس لینڈ کو پینالٹی ملی جس پر گلفی سگروسن نے گول کر کے مقابلہ برابر کردیا اور آئس لینڈ کی اگلے راؤنڈ تک رسائی کی امیدیں پھر سے زندہ ہو گئیں کیونکہ میچ جیتنے کی صورت میں وہ پری کوارٹر فائنل مرحلے میں پہنچ سکتے تھے لیکن میچ کے 90ویں منٹ میں ایوان پیریسک نے گول کر کے کروشیا کو 2-1 کی شاندار فتح سے ہمکنارکرادیا اور اس طرح کروشیا کی ٹیم پہلے راؤنڈ میں ناقابل شکست اور سرفہرست رہی جبکہ نائجیریا اور آئس لینڈ کا سفر پہلے ہی راؤنڈ میں تمام ہو گیا۔ایونٹ کے پری کوارٹر فائنل میں ارجنٹیناکا مقابلہ ورلڈ کپ کے لئے پسندیدہ قرار دی جانے والی فرانس اور کروشیا کا ڈنمارک سے ہو گا۔علاوہ ازیں پیرو نے آسٹریلیا کو شکست دے کر دوسرے راؤنڈ میں رسائی کا خواب چکنا چور کردیا جبکہ ڈرا میچ کھیلنے والی فرانس اور ڈنمارک کی ٹیموں نے پری کوارٹر راؤنڈ میں جگہ بنا لی۔فشت اسٹیڈیم میں کھیلے گئے گروپ سی کے اہم میچ میں آندرے کریلو کے گول کی بدولت پیرو نے میچ کے 18ویں منٹ میں برتی حاصل کی جو پہلے ہاف کے اختتام تک برقرار رہی۔دوسرے ہاف کا آغاز بھی آسٹریلیا کے لیے اچھا نہ تھا اور میچ کے 50ویں منٹ میں پاؤلو گوریرو کے گول کی بدولت پیرو کی برتری دگنی ہو گئی۔اس کے بعد آسٹریلیا کی ٹیم نے میچ میں واپسی اور گول اسکور کرنے کی متعدد کوششیں کیں لیکن وہ کامیابی نہ ہو سکی اور پیرو نے میچ میں 0-2 سے فتح اپنے نام کر لی۔اس فتح کے باوجود پیرو اور اس کے ساتھ آسٹریلیا کا بھی ورلڈ کپ میں سفر تمام ہو گیا۔دوسری جانب گروپ سی میں سابق عالمی چیمپیئن فرانس اور ڈنمارک کے درمیان لزنیکی اسٹیڈیم میں کھیلا گیا میچ بغیر کسی گول کے برابر رہا۔میچ برابر ہونے کے ساتھ ہی فرانس کی ٹیم گروپ سی میں سرفہرست رہی اور اس نے ڈنمارک کے ہمراہ اگلے راؤنڈ کے لیے کوالیفائی کر لیا۔فیفا ورلڈ کپ کے گروپ سی میں فرانس اور ڈنمارک کے درمیان میچ کسی گول کے بغیر ڈرا ہو گیا جو ایونٹ کا اولین بغیرگول ڈرا بھی رہا۔ دونوں ٹیموں کو 16 ٹیموں میں جگہ تومل گئی لیکن 38 میچوں میں پہلے بغیر گول کے ڈرامیچ کو اچھی نگاہ سے نہیں دیکھا گیا۔ ڈنمارک کے کوچ ایج ہاریڈی نے کہا کہ انہیں بہترین جوابی حملہ کرنیوالی ٹیم کا سامنا تھا اور پوائنٹ کے حصول کیلئے وہ اٹیک کرنے کی بیوقوفی نہیں کر سکتے تھے۔
