نئی دہلی۔26 اپریل (سیاست ڈاٹ کام ) تجربہ کار گوتم گمبھیر کی ناقص کارکردگی کی ذمہ داری کے ساتھ کپتانی چھوڑنے کے بعد اب آئی پی ایل کی ناکام ٹیم دہلی ڈیر ڈیولس ایک اور نئے کپتان شریس ایر کی قیادت میں ہے جن کا پہلا چیلنج جمعہ کو گھریلو میدان پر کولکتہ نائٹ رائیڈرس کے خلاف ٹیم کو کامیابی دلانے کے ساتھ اعتماد قائم رکھناہوگا۔دو مرتبہ کولکتہ نائٹ رائڈرس کو چمپئن بنانے والے گمبھیر کو آئی پی ایل کے11 ویں ایڈیشن میں واپس اپنی گھریلو ٹیم دہلی کے ساتھ جڑنے اور اس کی کپتانی کا موقع ملا تھا جس نے ٹورنمنٹ کے 10 برسوں میں کوئی کامیابی حاصل نہیں کی ہے ۔لیکن دہلی کی حالت ویسی ہی رہی اور وہ اپنے گزشتہ چھ میچوں میں پانچ ناکامیوں کے بعد سب سے آخری مقام پر کھسک گئی۔دہلی نے اپنا پچھلا میچ گھریلو فیروز شاہ کوٹلہ میدان پر جیت کے قریب آکر چار رنز سے گنوایا تھا جس سے ٹیم اور کپتان گمبھیر کافی مایوس ہوئے اور آنا فانا میں کوٹلہ میں پریس کانفرنس میں انہوں نے کپتانی چھوڑنے کا اعلان کر دیا، ساتھ ہی نوجوان شریس ایر کی اسی دوران تاجپوشی بھی کر دی گئی۔23 سال کے ممبئی کے شریس نے ہندوستانی ٹیم کے لئے چھ ونڈے اور چھ ٹوئنٹی 20 میچ کھیلے ہیں اور بہت تجربہ کار نہیں ہیں۔انہوں نے آئی پی ایل میں دہلی کے لئے اگرچہ تسلی بخش کارکردگی کا مظاہرہ کیا ہے اور پنجاب اور بنگلور کے خلاف مسلسل 57 اور 52 رنز کی نصف سنچری اننگز کھیلی۔انہوں نے چھ میچوں میں 37.75 کی اوسط سے 151 رن بنائے ہیں اور دوسرے بہترین اسکورر ہیں۔شریس پر اب دہری ذمہ داری رہے گی۔ایک طرف جہاں وہ ٹیم کے اہم اسکورر ہیں اور ان پر رنز بنانے کی ذمہ داری ہے تو دوسری طرف نوجوان کھلاڑی پر دہلی کو فتح کی پٹری پر لانے کی ذمہ داری ہے جسے ناک آؤٹ میں پہنچنے کے لیے سیزن کے باقی تمام میچ جیتنے ہوں گے ۔دہلی کے ٹاپ اسکورر نوجوان رشبھ پنت ہیں جنہوں نے چھ میچوں میں 37.83 کی اوسط سے سب سے زیادہ 227 رن بنائے ہیں۔دہلی ہر شعبہ میں کمزور رہی ہے اور بیٹنگ اس کی بڑی کمزوری ہے جہاں شریس اور رشبھ کے علاوہ کسی کے کھیل میں تسلسل نہیں ہے ۔آٹھ سال بعد دہلی کی ٹیم میں لوٹے اور کپتان بھی بنے گمبھیر سے اوپننگ میں رنز بنانے کی امید تھی جس میں وہ بری طرح ناکام رہے اور چھ میچوں میں 17.00 کی معمولی اوسط سے محض 85 رنز ہی بنا پائے ۔اس میں ان کا سب سے زیادہ اسکور 55 رن رہا ہے جو انہوں نے پہلے میچ میں موہالی میں کنگز الیون پنجاب کے خلاف بنایا تھا۔آئی پی ایل میں دو مرتبہ کے کے آر کے لئے فاتح کپتان رہ چکے گمبھیر نے راجستھان رائلس کے خلاف جے پور میں دوسرے میچ میں بیٹنگ نہیں کی تھی اور اس کے بعد اگلے چار میچوں میں انہوں 15، 8، 3 اور 4 جیسے انتہائی خراب اسکور بنائے ہیں۔وہ کپتانی سے بھلے ہی ہٹ گئے ہیں لیکن بطور کھلاڑی دستیاب رہیں گے اور امید کی جا سکتی ہے کہ وہ اب آخری الیون میں اپنی موجودگی درج کرائیں۔ٹیم کے دیگر بیٹسمینوں میں جیسن رائے ، گلین میکسویل، پرتھوی شا ہ جیسے کھلاڑی ہیں لیکن اب تک وہ بڑے اسکور نہیں بنا پائے ہیں اور ان کھلاڑیوں کو اب اپنی ذمہ داریاں ادا کرنی ہوں گی۔بولنگ میں اگرچہ دہلی کے پاس بہتر لائن اپ ہے جس میں فاسٹ بولر ٹرینٹ بولٹ، اویس خان، لیام پلنکٹ اور ڈینیل کرسٹین، اسپنر امت مشرا ہیں۔
