بارسلونا۔29 جنوری (سیاست ڈاٹ کام ) اسپینش فٹبال لیگ لا لیگا میں بارسلونا نے خطاب کیلئے اپنا موقف مزید مستحکم کرلیا ہے جبکہ اس کی روایتی حریف رئیل میڈرڈ نے بھی اپنا میچ جیت لیا لیکن رئیل میڈرڈ بدستور تیسرے نمبر پر اور بارسلونا اس سے10 نشانات آگے ہے۔ بارسلونا نے گیرونا کے خلاف 2-0 سے کامیابی حاصل کی۔ نیلسن شیمیڈواورلیونل میسی نے فی کس ایک گول کیا۔ اس کامیابی سے بارسلونا نے خطاب کی دوڑمیں اپنی قریبی حریف ٹیم ایٹلیٹکو میڈرڈ پر5 نشانات کی برتری حاصل کر لی جبکہ رئیل میڈرڈ کے39پوائنٹس ہیں اوروہ21میچ کھیل کرتیسرے نمبر پر ہے۔ بارسلونا کے کھلاڑی لوئس سواریز کے خلاف خطرناک فاول پر گیرونا کے کھلاڑی برناردو ایسپینوس کو دوسرے ہاف میں باہر بھی ہونا پڑا۔ دوسری جانب رئیل میڈرڈ نے ایسپینول کے خلاف میچ 2-4 سے جیت لیا۔اس میچ میں رئیل کے ایک کھلاڑی کو باہر بھیجا گیا اور اسے10کھلاڑیوں سے کھیلنا پڑاتاہم اس کے باوجود وہ جیتنے میں کامیاب رہی۔کئی میچوں میں کوچ کی جانب سے باہر بٹھائے جانے والے اپنے دور کے مہنگے ترین کھلاڑی گیرتھ بیل بھی ایک گول کرنے میں کامیاب رہے۔کریم بینزیما نے ٹیم کو برتری دلائی جسے کپتان سرگیو راموس نے دگناکیا۔ اسی دوران ایسپینیول نے بھی ایک گول کر دیا۔کریم بینزیما نے اپنا دوسرا اور ٹیم کا تیسرا گول کرکے ٹیم کا موقف مستحکم بنائی جسے گیرتھ بیل نے اپنے گول سے مزید بہتر بنادیا۔ میچ ختم ہونے سے10منٹ پہلے روبرٹو روسالس نے ایسپینول کا دوسرا گول کیا لیکن اس کے بعد کسی ٹیم کی جانب سے مزید کوئی گول نہ کیا جاسکا اور مقابلہ رئیل میڈرڈ کے حق میں ختم ہوگیا۔
