ریوڈی جینرو۔27 فروری (سیاست ڈاٹ کام ) فرانسیسی فٹبال کلب پیرس سینٹ جرمین کیلئے کھیلنے والے برازیلی اسٹار نیمر جونیئر سابق کلب بارسلونا کے سوپر اسٹار کھلاڑی اورکپتان لیونل میسی کا ذکر کرتے ہوئے آبدیدہ ہو گئے اور کہا کہ میسی نے انتہائی مشکل وقت میں میرا ساتھ دیا اور اس مقام تک پہنچنے کا موقع فراہم کیا۔ انجری مسائل کی وجہ سے ان دنوں آرام کرنے والے نیمار مہنگے ترین فٹبالر کی حیثیت سے بارسلونا چھوڑکر پیرس منتقل ہوئے تھے اوراس وقت ان کا موقف تھا کہ میسی کی وجہ سے وہ بارسلونا میںکبھی نمایاں نہیں ہو سکتے اس لئے ہسپانوی کلب چھوڑ کر جانے پر مجبور ہیں۔ نیمر نے کہا کہ یہ وہ کہانی ہے جو میں ہر کسی کو سناتا ہوں کہ میسی نے اس وقت مجھے سہارا دیا جب مجھے انتہائی سخت ضرورت تھی اور انہوں نے وہ محبت اور حمایت فراہم کی جس کے نتیجے میں آج میں اس مقام پر ہوں۔ یہ کہتے ہوئے نیمر اپنے آنسوں پر قابو پانے کی کوشش کررہے تھے۔ میسی نے کہا تھا کہ مجھ سمیت کسی سے ڈرنے کی ضرورت نہیں اور شرمانے کے بجائے اپنے کھیل کے ذریعے خود کو ثابت کروکہ تم ٹیم کی ضرورت ہو۔ بارسلونا واپسی کے امکان کو مسترد نہ کرتے ہوئے نیمر نے کہا کہ وہاں میسی جیسے دوست ہیں جنہیں میں بے حد اہمیت دیتا ہوں۔
