بارسلونا۔8 جنوری (سیاست ڈاٹ کام) ہسپانوی کلب بارسلونا نے نئے سال کا آغاز کامیابی کے ساتھ کرتے ہوئے جیٹافے کو 2-1 گول سے شکست دی اور اسپینش لیگ’’لا لیگا‘‘ میں اپنے پہلے مقام کو مضبوط کر لیا ہے ۔ دوسری جانب لیگ میں دوسرے نمبر کی ٹیم ایٹلیٹکو میڈرڈ اور سیویلا کا میچ ایک گول سے برابر رہا۔ لیگ ٹیبل پر ایٹلیٹکو میڈرڈ بارسلونا سے 5 نشانات پیچھے ہے جبکہ روایتی حریف رئیل میڈرڈ اور بارسلونا کے نشانات میں10کا فرق آچکا ہے اور رئیل میڈرڈ اس وقت پانچویں مقام پر ہے۔ چھٹیاں گزار کر آنے والے تازہ دم لیونل میسی نے میچ کے 20 ویں منٹ میں بارسلونا کو برتری دلائی اور بہت مشکل زاویے سے گول کرکے اپنی مہارت کا بھرپور ثبوت دیا۔اسی میچ میں میسی نے جیٹافے کے 5 دفاعی کھلاڑیوں کو چکمہ دے کر لوئس سواریز کو ایک شاندار پاس دیا لیکن سواریز اسے گول میں تبدیل نہ کر سکے اور ان کی شاٹ گول کیپر کے قریب ہی پول سے ٹکرا گئی جسے کیپر نے دبوچ لیا۔ میسی کے اس پاس کو اس سال کا اب تک سب سے اچھا پاس قرار دیا جا رہا ہے۔ بارسلونا کے لئے دوسرا گول لوئس سواریز نے اسکور کیا جبکہ اس کے 3 منٹ بعد جیٹافے کو بھی خسارہ کم کرنے کا موقع مل گیا۔ دوسرے ہاف میں کوئی ٹیم گول نہ کرسکی اور میچ بارسلونا کے نام رہا۔ لیگ کے ایک اور میچ میں ایٹلیٹکو میڈرڈ شکست سے بچ گئی۔ لیگ میں تیسرے نمبر پر سیویلا نے اس کے خلاف برتری حاصل کرلی تھی لیکن اسے برقرار رکھنے یا مزید گول کرنے میں ناکام رہی۔ ایٹلیٹکو کے فرانسیسی کھلاڑی اینٹون گریزمان نے میچ برابر کردیا اور ٹیم نشانات کے جدول پر تنزلی سے بھی بچ گئی۔شاندرا مظاہروں کی بدولت بارسلونا نے لالیگا میں خطاب کی مضبوط دعویدار بن گئی ہے۔
