لاہو۔21 مئی (سیاست ڈاٹ کام ) انٹرنیشنل کرکٹ کونسل(آئی سی سی) نے نئے فیوچر ٹور پروگرام میں ٹسٹ میچز کے دوران ٹاس ختم کرنے کی تجویز پر غور شروع کردیا ہے جس کی پاکستانی سابق کپتان جاوید میانداد نے حمایت کی ہے تاہم سابق کرکٹر سلیم الطاف اس تجویز کی مخالفت میں سامنے آ گئے ہیں۔آئی سی سی کی کرکٹ کمیٹی نئے فیوچر ٹور پروگرام میں ٹسٹ چیمپیئن شپ کے لئے ٹاس کو ختم کرنے پر بحث کرے گی جہاں اس تجویز کا بنیادی مقصد میزبان ٹیم کے فوائد کو ختم کرنا ہے۔1877 میں انگلینڈ اور آسٹریلیا کے درمیان کھیلے گئے ٹسٹ میچ کے بعد سے اب تک کھیلے گئے ہر ٹسٹ میچ کا آغاز ٹاس سے ہی ہوا جس کے بعد ٹاس جیتنے والی ٹیم بیٹنگ یا بولنگ کا فیصلہ کرتی ہے۔روایت کے تحت میزبان ٹیم کا کپتان ٹاس اچھالتا ہے اور مہمان کپتان ہیڈ یا ٹیل بولتا ہے لیکن اب اس 140سال پرانی روایت کو ختم کرنے پر غور کیا جا رہا ہے۔آئی سی سی کرکٹ کمیٹی رواں ماہ کے آخر میں ممبئی میں مجوزہ اجلاس میں ٹاس ختم کرنے یا نہ کرنے کے حوالے سے بحث کرے گی جہاں ٹاس کو ختم کرنے کا بنیادی مقصد مہمان ٹیم کو جیت کا یکساں مواقع فراہم کرنا ہے کیونکہ عام تاثر یہ ہے کہ میزبان ٹیم اپنی مرضی کی وکٹ تیار کرتی ہے جس سے میچ میں توازن برقرار نہیں رہتا جس کی وجہ سے کمیٹی اس بات پر بھی بحث کرے گی کہ کیا مہمان ٹیم کے کپتان کو بیٹنگ یا بولنگ کرنے کا اختیار دیا جا سکتا ہے؟۔ جاوید میانداد نے اس تجویز کی حمایت کرتے ہوئے کہا ہے کہ اگر آئی سی سی ٹاس ختم کرنے کی تجویز پر عمل کرتا ہے تو اس میں کوئی نقصاندہ بات نہیں کیونکہ اس کی بدولت میزبان ٹیم اپنے لیے موزوں وکٹ بنانے کے بجائے معیاری پچ تیار کرے گی۔سلیم الطاف نے موقف اختیار کیا کہ کرکٹ کے لیے بہتر یہی ہے کہ اسپورٹنگ وکٹیں تیار کی جائیں جو بیٹنگ، اسپنرز اور فاسٹ بولروں کے لیے یکساں مددگار ہوں اور یہ آئی سی سی کے لیے بڑا چیلنج ہے۔
