نئی دہلی 14 جون (سیاست ڈاٹ کام) ملک میں مہنگائی پر قابو پانے حکومت کے اقدامات کے بعد افراط زر کی شرح کو اطمینان بخش قرار دیتے ہوئے فینانس سکریٹری اروند مایارام نے آج کہاکہ ملک میں قیمتوں کی صورتحال مزید بہتر ہوگی اور مہنگائی میں کمی واقع ہوگی۔ حالیہ حکومت نے بڑھتی قیمتوں پر روک لگادی ہے۔ پیداوار میں اضافہ پر بھی توجہ دی جارہی ہے۔ غذائی اشیاء کی قیمتوں میں بہت زیادہ اضافہ ہوا تھا۔ اُنھوں نے کہاکہ ان اشیاء کی پیداوار کو یقینی بنانے کی ضرورت ہے۔ آنے والے دنوں میں غذائی اشیاء کی خریداری میں اضافہ سے قیمتوں میں بھی اضافہ ہوسکتا ہے لہذا قیمتوں میں استحکام لانے کے لئے حکومت نے اقدامات کئے ہیں جس سے افراط زر پر مؤثر طریقہ سے قابو کرلیا جائے گا۔ یہ پوچھے جانے پر کہ آیا افراط زر میں گراوٹ کا رجحان معیشت کے لئے مثبت ہوگا۔ مایارام نے کہاکہ بلاشبہ مہنگائی پر قابو پایا جاسکے گا۔ اب کمی کا رجحان چل رہا ہے اور یہ افراط زر بھی بتدریج نیچے جائے گا۔ مجھے پورا اعتماد ہے کہ حکومت نے جو اقدامات کئے ہیں اس کے اثرات دکھائی دے رہے ہیں۔ پیداوار کو بڑھانے کے لئے حکومت کوشش کررہی ہے تو معیشت میں بھی سدھار آئے گا۔ افراط زر کی شرح کو مزید نیچے جانا ہے۔ مارکٹ میں ریٹیل افراط کی شرح 3 ماہ کے اندر سب سے کم شرح درج کی گئی ہے جو 8.28 فیصد رہی۔ اپریل میں یہ شرح 8.59 فیصد تک پہونچ گئی تھی۔ قیمتوں میں کمی سے ترکاریوں، دالوں اور ڈایری کی اشیائل کی قیمتیں گھٹ گئی ہیں۔ مارکٹ میں قیمتوں پر قابو پانے کے لئے کئی ایک اقدامات کئے جارہے ہیں۔ اس کے علاوہ فوڈ پروسسنگ صنعت کو بھی زبردست تقویت دی جارہی ہے۔ جبکہ ہندوستان اس وقت ساری دنیا میں ترکاریوں اور میوہ جات کی پیداوار میں سب سے بڑا ملک ہے۔ مایا رام نے کہاکہ نریندر مودی حکومت تمام ضروری اقدامات کرتے ہوئے مہنگائی پر قابو پانا چاہتی ہے۔ زرعی شعبہ میں بھی طویل مدتی برآمداتی مارکٹ کو فروغ دینے کی ضرورت پر زور دیا گیا ہے۔
