بروسیلز ،3دسمبر (سیاست ڈاٹ کام) موسمیاتی تبدیلیوں کے خلاف 65 ہزار افراد نے یوروپی یونین کے دارالحکومت بروسیلز کی سڑکوں پر مظاہرہ کیا۔بیلجیئم کی تاریخ میں موسمیاتی تبدیلی کے حوالہ سے یہ سب سے بڑا مظاہرہ قرار دیا جا رہا ہے ۔ ‘کلیم دی کلائمیٹ’ نامی اس مظاہرے میں ملک بھر سے لوگوں نے شرکت کی ۔یہ مظاہرہ پولینڈ میں کلائمیٹ چینج کیلئے اقوام متحدہ کے زیراہتمام منعقد ہونے والی چوبیسویں کانفرنس (سی او پی 24) کے آغاز کے موقع پر کیا گیا تھا ۔غیر ملکی میڈی رپورٹس کے مطابق مظاہرین نے مطالبہ کیا کہ یوروپ پیرس ایگریمنٹ کے تحت دنیا کے درجہ حرارت میں ڈیڑھ فیصد کمی کیلئے اقدامات کرے ۔اس مظاہرے کا اہتمام نوجوانوں کی تنظیم‘ کلائمیٹ ایکسپریس’ نے کولیشن برائے موسمیاتی تبدیلی اور بوس کے تعاون سے کیا تھا ۔نارڈ اسٹیشن سے شروع ہونے والے مظاہرے کے شرکاء جلد ہی مادو ، البرٹ ٹولائن، بوٹانک ، ریو دا لا لوا اور یوروپین کمیشن اور کونسل کی عمارات کے سامنے واقع شومین کے سارے علاقے میں پھیل گئے ۔اس مظاہرے میں اسٹیل انڈسٹری کے 34 ہزار ملازمین سمیت زندگی کے ہر شعبے سے تعلق رکھنے والے افراد نے شرکت کی جبکہ ٹریکٹر ٹرالیوں سمیت ایک بڑی تعداد سائیکلوں پر بھی آئی تھی ۔اس موقع پر دارالحکومت بروسیلز میں پبلک ٹرانسپورٹ میں سے بسیں مفت اور میٹرو کا کرایہ انتہائی کم وصول کیا گیا جبکہ مظاہرے میں شرکت کیلئے 30 ہزار سے زائد افراد ٹرین سے آئے تھے ۔
