لندن۔25 ستمبر (سیاست ڈاٹ کام ) کروشیا کے اسٹار فٹبالر لوکا موڈرچ نے سال کے بہترین فیفا کھلاڑی کا ایوارڈ جیت لیا۔ کروشیائی کھلاڑی نے اس موقع پر یہ ایوارڈ اپنے مداحوں کے نام کیا۔فیفا کی جانب سے لندن ساوتھ بینک کے رائل فیسٹول ہال میں اس شاندار تقریب کا انعقاد کیا گیا۔2007ء کے بعد یہ پہلا موقع ہے جب ارجنٹینا کے لیونل میسی اور پرتگال کے کرسٹیانو رونالڈو کے علاوہ کوئی تیسرا کھلاڑی یہ بڑا ایوارڈ اپنے نام کرنے میں کامیاب ہوا۔ یہاں یہ بات بھی قابل ذکر ہے کہ گزشتہ برس کے پلیئر آف دی ایرکرسٹیانو رونالڈو ،کروشیا کے لوکا موڈرچ اور مصر کے محمد صلاح کے درمیان ایوارڈ کیلئے کافی سخت اورمسابقتی مقابلہ تھا۔دوسری جانب برازیل کی خاتون فٹبالر مارتا کو حیران کن طور پر چھٹی مرتبہ وومن پلیئر آف دی ایئرقرار دیا گیا۔ مصر کی ٹیم کے کپتان اور انگلش کلب لیور پول کے اسٹرائیکر محمد صلاح کے انگلش پریمیئرلیگ میں ایورٹن کے خلاف گول کو سال کا بہترین گول قرار دیا گیاجبکہ گول کیپر آف دی ایرکا ایوارڈ تھیباوکورٹیس نے جیتا۔ بہترین کوچ کا ایوارڈ فرانس کے ڈیڈیئر ڈیشامپ کے نام رہا،ڈیشامپ کی کوچنگ میں فرانس نے اس سال فٹبال ورلڈ کپ کا خطاب جیتا ہے۔ ویمنزبیسٹ کوچ آف دی ایئر فرانس کے رینالڈ پیڈروس کو قرار دیا گیا۔
