نئی دہلی5مارچ (سیاست ڈاٹ کام ) کانگریس صدر راہل گاندھی نے وزیراعظم نریندر مودی کے لئے پیر کے روز نازیبا الفاظ کا استعمال کیا اور ان الزام لگایا کہ اترپردیش کے امیٹھی میں آرڈیننس فیکٹری کے بارے میں مودی نے اتوار کو جھوٹ بولا تھا۔ راہول گاندھی نے ٹویٹ کیا کہ وزیراعظم جی امیٹھی کی آرڈیننس فیکٹری کا سنگ بنیاد 2010 ء میں مَیں نے خود رکھا تھا۔ گزشتہ کئی برسوں سے وہاں چھوٹے ہتھیار تیار کئے جارہے ہیں۔ کل آپ امیٹھی گئے اور اپنی عادت سے مجبور ہوکر آپ نے پھر جھوٹ بولا۔ کانگریس صدر نے کہا کہ اس فیکٹری میں کئی برسوں سے چھوٹے ہتھیار تیا کئے جارہے ہیں لیکن مودی نے وہاں بھی غلط بیانی سے کام لیا۔ انہوں نے وزیراعظم کے لئے قابل اعتراض الفاظ کا بھی استعمال کیا اور کہا کہ کیا آپ کو بالکل شرم نہیں آتی۔
