نئی دہلی۔ 31جولائی (سیاست ڈاٹ کام) تین روزہ دورہ پر دہلی آئیں ترنمول کانگریس کی سربراہ ممتا بنرجی کا اس دوران قومی اپوزیشن پارٹیوں کو متحد کرنے کے لئے ان پارٹیوں کے سرکردہ لیڈروں سے ملنے کا امکان ہے . وہ انہیں آئندہ 19 جنوری کی ریلی کے لئے مدعو بھی کریں گی۔ترنمول کانگریس کے ذرائع کے مطابق مغربی بنگال کی چیف منسٹر کا منگل یا چہارشنبہ کو پارلیمنٹ کے سینٹرل ہال جانے کا پروگرام ہے اور وہ اپوزیشن پارٹیوں کے رہنماؤں میں شامل متحدہ ترقی پسند اتحاد کی صدر سونیا گاندھی سے ذاتی طور پر مل کر آئندہ 19 جنوری کو کولکتہ میں ‘وفاقی اور بی جے پی مخالف قوتوں ‘کی ریلی کے لئے مدعو کر سکتی ہیں۔ممتا بنرجی نے مرکزی وزیر داخلہ راج ناتھ سنگھ سے بھی ملاقات کا وقت طلب کی ہیں۔ ان سے آسام میں قومی شہریت رجسٹر (این آرسی) کے مسئلے پر بات چیت کرنے کا امکان ہے . وہ کیتھولک بشپ کانفرنس کی طرف سے منگل کو منعقد کانفرنس میں لیکچر بھی دیں گی۔پارٹی ذرائع کے مطابق ممتا بنرجی کا سینئر وکیل رام جیٹھ ملانی، سابق بی جے پی لیڈر یشونت سنہا اور موجودہ بی جے پی ایم پی شتروگھن سنہا سے بھی ملنے کا پروگرام ہے ۔ دہلی کے چیف منسٹر اروند کجریوال سے بھی ملاقات کی امید ہے ۔
