ممبئی۔9اپریل(سیاست ڈاٹ کام ) تین بار کی چمپئن ممبئی انڈینس کی ٹیم آئی پی ایل کے رواں سیزن میں اتار چڑھاو سے گزر رہی ہے اور کل کنگز الیون پنجاب سے گھریلو میدان میں گزشتہ شکست کا بدلہ لینے کے ساتھ اپنے موقف کو مضبوط کرنے کے لیے اترے گی ۔ ممبئی نے گزشتہ پانچ میچوں میں تین جیتے اور دوہارے ہیں، وہ چھ نشانات کے ساتھ اب پانچویں نمبر پر ہے جبکہ کنگز الیون پنجاب نے چھ میچوں میں چار جیتے اور دو ہارے ہیں اور آٹھ پوائنٹس کے ساتھ اب تیسرے نمبر پر بہتر حالت میں ہے ۔ پنجاب نے اپنا پچھلا میچ گھریلو موہالی گراؤنڈ پر سن رائزرس حیدرآباد سے چھ وکٹ سے جیتا تھا جبکہ ممبئی نے بھی اپنا پچھلا میچ حیدرآباد کے خلاف40 رنز سے جیتا تھا۔راوں سیزن میں پنجاب کی ٹیم ممبئی کو اپنے گھریلو موہالی گراؤنڈ پر آٹھ وکٹوں سے شکست دے چکی ہے اور اس بار ممبئی کی کوشش اپنے گھریلو وانکھیڑے میدان پر گزشتہ شکست کا بدلہ لے کر ٹیموں کے صف بندی میں اپنا موقف بہتر بنانے کی رہے گی۔ پہلے خطاب کی تلاش میں مصروف پنجاب کا مظاہرہ ٹورنمنٹ میں اب تک تسلی بخش رہا ہے اور وہ چاہے گی کہ اس تال کو برقرار رکھے ۔ پنجاب نے حیدرآباد کے خلاف گزشتہ میچ میں شاندار بولنگ کی تھی اور اسے150 پر روک دیا تھا۔ ٹیم کے پاس بولروں اور بیٹسمینوںکو اچھا مجموعہ ہے ۔ خود کپتان اور تجربہ کار آف اسپنر روی چندرن اشون بولنگ کی قیادت کر رہے ہیں اور گزشتہ چھ میچوں میں انہوں نے سات وکٹ لئے ہیں۔ ان کے علاوہ سام کیرن اور محمد سمیع بھی کافی کامیاب ثابت ہوئے ہیں۔ پنجاب کے بیٹسمینوں نے بھی اب تک اچھا کھیل دکھایا ہے جن میں سرفراز خان، لوکیش راہول، ڈیوڈ ملر، کرس گیل اور مینک اگروال اہم ہیں ۔ گزشتہ میچ میں بھی مینک نے 55 رنز اور اوپنر راہول نے ناٹ آؤٹ71 رنز کی نصف سنچریاں بنائی تھیں اور ٹیم کو کامیابی دلائی تھی، لیکن گیل سے فام میں واپس آنے کی توقع رہے گی جن کی کارکردگی میں تسلسل کی کمی ہمیشہ بڑا مسئلہ رہی ہے ۔ دوسری طرف ممبئی کی کوشش رہے گی کہ پنجاب کو اپنے گھریلو میدان پر شکست دے کر گزشتہ شکست کا بدلہ لے ۔ دونوں کے درمیان ہوئے گزشتہ میچ میں ممبئی نے سات وکٹ پر 176 رنز بنائے تھے جس کے جواب میں پنجاب نے راہول کی ناٹ آؤٹ71 رنز اورگیل کی40 کے علاوہ مینک کی43 رنز کی اننگز کی بدولت 18.4 اوور میں ہی میچ جیت لیا تھا۔ممبئی نے گزشتہ میچ میں حیدرآباد کو اسی کے گھر میں شکست دی تھی اور بلند اعتماد کے ساتھ وہ اپنے گھریلو میدان پر بھی کامیاب کارکردگی کرنا چاہے گی۔ دلچسپ یہ رہا کہ اس میچ میں ممبئی کے بولروں نے ٹیم کے 136 رن کے چھوٹے اسکور کا بھی بخوبی دفاع کر لیا جس کا سہرا ویسٹ انڈیز کے الجاری جوزف کو جاتا ہے جنہوں نے ٹیم کے ساتھ اپنے پہلے ہی میچ میں3.4 اوور کی بولنگ میں 12 رن پر چھ وکٹ کے بے مثال مظاہرہ کیا تھا۔ پنجاب کے بیٹسمینوں کے لئے جوزف کا خوف یقینا رہے گا جبکہ جسپریت بمراہ، ہاردک پانڈیا کے طور پر ممبئی کے پاس اچھا بولنگ شعبہ ہے لیکن ٹیم کو بیٹنگ میں بہتری بھی دکھانا ہوگی۔ ہاردک ،کیرون پولارڈ،کوئنٹن ڈی کاک اور آل راؤنڈر یوراج سنگھ کے طور پر ٹیم کے پاس اچھے بیٹسمین ہیں۔ اس کے علاوہ کپتان روہت شرما اور سوریا کمار یادو اچھے رنز اسکوررر ہیں۔گیل کا اپنے ٹیم کے بولر جوزف سے سامنا اہم ہوگا۔
