ریاض۔28 جولائی (سیاست ڈاٹ کام) فلسطینی اتھارٹی کے سربراہ محمود عباس نے اعلیٰ اختیاراتی فلسطینی وفد کے ہمراہ سعودی فرمانروا شاہ عبداللہ بن عبدالعزیز آل سعود سے جدہ میں ان کے شاہی محل میں ملاقات کی۔ دونوں رہنماؤں کے درمیان ہونے والی ملاقات میں فلسطین کی موجودہ صورتحال بالخصوص غزہ کی پٹی پر صہیونی فوج کی وحشیانہ جارحیت پر تفصیلی تبادلہ خیال کیا۔ اس موقع شاہ عبداللہ نے صدر محمود عباس کو مشکل وقت میں فلسطینی عوام کی ہر ممکن مدد جاری رکھنے کی یقین دہانی کرائی۔ اس ملاقات میں ولی عہد و نائب وزیر اعظم شہزادہ مقرن بن عبدالعزیز، شاہ عبداللہ کے مشیر خاص اور جنرل انٹیلی جنس چیف شہزادہ خالد بن بندر بن عبدالعزیز، نیشنل گارڈز کے وزیر شہزادہ متعب بن عبداللہ بن عبداللہ بن عبدالعزیز، وزیر داخلہ شہزادہ محمد بن نائف بن عبدالعزیزو دیگر بھی موجود تھے۔
