لندن ۔6 اگسٹ (سیاست ڈاٹ کام )انگلینڈ نے ہندوستان کے خلاف دوسرے ٹسٹ میچ کے لیے اسکواڈ کا اعلان کرتے ہوئے ناقص کارکردگی پر ڈیوڈ ملان کو اسکواڈ سے خارج کردیا ہے۔ ایجبسٹن میں کھیلے گئے سیریز کے پہلے ٹسٹ میچ میں کوہلی کی شاندار بیٹنگ رائیگاں گئی اور انگلش بولروں نے عمدہ کھیل پیش کرتے ہوئے اپنی ٹیم کو فتح سے ہمکنار کرایا۔اسٹوکس نے پہلے ٹسٹ میچ کی دوسری اننگز میں شاندار بولنگ کرتے ہوئے کوہلی سمیت تین اہم کھلاڑیوں کو پویلین رخصت کر کے اپنی ٹیم کو فتح سے ہمکنار کروایا تھا لیکن مقدمے کی سماعت کے سبب وہ اگلا میچ نہیں کھیل سکیں گے۔گزشتہ سال برسٹل کے کلب میں بین اسٹوکس کا جھگڑا ہوا تھا اور پیر سے ان کے مقدمے کی سماعت شروع ہو رہی ہے جس کے سبب وہ ٹیم کو اگلے میچ میں دستیاب نہیں ہوں گے۔اسٹوکس کے متبادل کے طور پر کرس ووکس کو اسکواڈ میں شامل کر لیا گیا ہے جو گھٹنے کی تکلیف کی وجہ سے کچھ عرصے سے انگلش ٹیم کی نمائندگی نہیں کر سکے۔تاہم رواں سیزن میں ناقص فارم کا شکار ڈیوڈ ملان کو اسکواڈ سے خارج کردیا گیا اور ایجبسٹن ٹسٹ میں مجموعی طور پر 28 رنزسمیت گزشتہ 5 اننگز میں 74رنز کی ناقص کارکردگی پر انہیں اسکواڈ سے باہر کردیا گیا۔ملان کی جگہ کاؤنٹی چیمپیئن شپ میں بہترین فارم کا مظاہرہ کرنے والے اولی پوپ کو اسکواڈ کا حصہ بنایا گیا جنہوں نے اب تک کاؤنٹی سیزن میں 85 سے زائد کی اوسط سے 684 رنز اسکور کیے ہیں تاہم بین الاقوامی کرکٹ میں انہوں نے اپنے کریئر کا ابھی آغاز نہیں کیا ہے۔ انگلش اسکواڈ ان کھلاڑیوں پر مشتمل ہے۔ایلسٹر کک، کیٹن جیننگز، جو روٹ، اولی پوپ، جونی بیئراسٹو، جوزبٹلر،کرس ووکس، سیم کیرن، عادل رشید، اسٹورٹ براڈ، معین علی، جیمز اینڈرسن اور جیمی پورٹر۔انگلینڈ اور ہندوستان کے درمیان سیریز کا دوسرا ٹسٹ میچ 9 تا 13 اگست کو لارڈز میں کھیلا جائے گا۔
