لاہور۔27اگسٹ (سیاست ڈاٹ کام )پاکستان کے سابق ٹسٹ کرکٹر مشتاق احمد نے بنگلہ دیش کرکٹ بورڈ (بی سی بی) کی جانب سے بولنگ کوچ بننے کی درخواست پر معذرت کرلی۔ذرائع کے مطابق بی سی بی نے پاکستان ٹیم کے سابق لیگ اسپنر سے رابطہ کیا اور انہیں بین الاقوامی کرکٹ ٹیم کا بولنگ کوچ بننے کی پیشکش کی۔مشتاق احمد نے بی سی بی کی اس پیشکش پر معذرت کرتے ہوئے کہا کہ وہ پاکستان میں ہی اپنی ذمہ داریاں نبھانا چاہتے ہیں۔واضح رہے کہ مشتاق احمد اس وقت نیشنل کرکٹ اکیڈمی (این سی اے) میں ہیڈ کوچ کی ذمہ داریا نبھارہے ہیں، تاہم ذرائع نے اس حوالے سے کہا کہ مستقبل قریب میں پاکستانی کرکٹ ٹیم کا حصہ بھی بن سکتے ہیں۔خیال رہے کہ مشتاق احمد 2008 میں انگلینڈ کی ٹیم کے ساتھ بطور بولنگ کوچ منسلک ہوئے اور 6 سال تک اپنی خدمات انجام دیتے رہے۔اسی دوران انگلینڈ کی ٹیم 2010 ورلڈ ٹی ٹوئنٹی میں کامیابی حاصل کی جبکہ انہی کے دور میں انگلینڈ کو گرائم سوان جیسا عالمی معیاری بولر ملا تھا۔
