لندن ۔24 اپریل (سیاست ڈاٹ کام )پاکستانی ٹیم کے فاسٹ بولر محمد عامر کی ویزا مسائل کے سبب انگلینڈ روانگی موخر ہو گئی ہے اور وہ دورہ آئرلینڈ اور انگلینڈ کے لئے اپنی ٹیم کے ہمراہ روانہ نہ ہو سکے۔پاکستان کرکٹ بورڈ کے ترجمان امجد بھٹی نے تصدیق کرتے ہوئے کہا کہ عامر ٹیم کے ہمراہ سفر نہیں کر سکے، ان کے ویزا کے چند مسائل تھے جو امید ہے کہ کل تک حل ہو جائیں گے۔امجد بھٹی نے یہ واضح نہیں کیا کہ محمد عامر کو ویزا کے حصول میں کن مشکلات کا سامنا ہے لیکن انہوں نے امید ظاہر کی کہ آئندہ دو دن کے اندر فاسٹ بولر کو ویزا جاری کردیا جائے گا۔میڈیا رپورٹس کے مطابق عامر کی بیوی برطانوی شہریت کی حامل ہیں جس کی وجہ سے انہوں نے نے طویل المدتی ویزا کی درخواست پہلے سے دے رکھی تھی تاکہ وہ برطانوی پاسپورٹ حاصل کر سکیں۔یہ پہلا موقع نہیں کہ عامر کو ویزا کے حصول میں مشکلات کا سامنا کرنا پڑا ہو بلکہ 2016 میں ٹیم کے دورہ انگلینڈ کے موقع پر بھی انہیں ویزا کے حصول میں مشکلات پیش آئی تھیں جس پر پی سی بی نے انگلینڈ اینڈ کرکٹ بورڈ سے مدد طلب کی تھی۔2010 ء کے اسپاٹ فکسنگ اسکینڈل میں ملوث ہونے پر محمد عامر پر 5 سال کی پابندی عائد کر دی گئی تھی اور اس جرم کے سبب انہیں انگلینڈ میں جیل بھی جانا پڑا تھا۔دوسری جانب پاکستان کرکٹ ٹیم کے کھلاڑی اور عہدیدار دورہ آئرلینڈ اور انگلینڈ کے لئے برطانوی شہر لندن پہنچ گئے ہیں جہاں ٹیم 28 اپریل کو کینٹ کے خلاف 4 روزہ وارم اپ میچ سے اپنی مہم کا آغاز کرے گی۔پاکستان اپنا دوسرا 4 روزہ میچ 4 سے 7 مئی تک نارتھ ہیمپٹن شائر کے خلاف کھیلے گا جس کے بعد آئرلینڈ کے خلاف واحد ٹسٹ 11 مئی سے شروع ہوگا۔آئرلینڈ سے میچ کے بعد مہمان ٹیم 19 اور 20 مئی کو لیسٹر شائر کے خلاف 2 روزہ پریکٹس میچ کھیلے جس کے بعد 24 مئی کوانگلینڈ کے خلاف 2 ٹسٹ میچز کی سیریز شروع ہو گی۔