لندن۔ 5 مئی (سیاست ڈاٹ کام) انگلش پریمیئر فٹ بال لیگ میں لیور پول نے نیوکیسل یونائیٹڈ کو سنسنی خیز مقابلے کے بعد شکست دے کر پوائنٹس ٹیبل پر ٹاپ پوزیشن حاصل کر لی ہے ۔اس میچ میں مصر اور لیور پول کے ا سٹار فٹ بال کھلاڑی محمد صالح نے ٹاپ پورپین فٹ بال لیگ میں اپنے ذریعے کئے گئے گولوں کی سنچری مکمل کر لی۔ انہوں نے انگلش پریمیئر لیگ میں 56، اٹالین سرے اے میں 35 اور سوئس سپر لیگ میں 9 گول کر رکھے ہیں۔فاتح ٹیم کی جانب سے ڈیووک اوریگی نے میچ کے آخری لمحات میں گول کر کے ٹیم کو فتح دلائی، اس کامیابی کے ساتھ ہی لیور پول نے مانچسٹر سٹی پر خطاب جیتنے کیلئے دباؤ بھی بڑھا دیا ہے ۔انگش پریمیئر لیگ کے سلسلے میں کھیلے گئے میچ میں لیور پول نے شاندار کھیل پیش کرتے ہوئے نیوکیسل یونائیٹڈ کو سخت مقابلے کے بعد 3۔2 سے ہرا کر پوائنٹس ٹیبل پر ٹاپ پوزیشن پر قبضہ کر لیا۔13ویں منٹ میں لیورپول کے وان ڈک نے گول کر کے ٹیم کو برتری دلائی۔20ویں منٹ میں نیوکیسل کے ایٹسو نے گول کر کے مقابلہ برابر کر دیا۔28ویں منٹ میں لیورپول کے محمد صالح نے گول کر کے ٹیم کو ایک بار پھر برتری دلا ئی جو پہلے ہاف کے اختتام تک برقرار رہی۔ دوسرے ہاف کے 54ویں منٹ میں نیوکیسل کے رونڈن نے گول کر کے مقابلہ دوبارہ 2-2 گول سے برابر کر دیا۔میچ کے آخری لمحات میں لیورپول کے اوریگی نے گول کر کے ٹیم کی برتری 3۔2 گول کر دی اور ان کا یہ گول فیصلہ کن ثابت ہوا۔
