ابوظہبی ۔5 ڈسمبر (سیاست ڈاٹ کام ) پاکستان کرکٹ ٹیم کے تجربہ کار آل راؤنڈر محمد حفیظ نے مستقل ناقص فارم کے سبب ٹسٹ کرکٹ سے سبکدوشی کا اعلان کردیا ہے۔ غیرقانونی بولنگ ایکشن اور خراب فارم کے باعث محمد حفیظ کا کیریئر خصوصاً ٹسٹ کرکٹ میں انہیں مسائل کا سامنا رہا اور حالیہ عرصے میں وہ وقتاً فوقتاً ٹیم سے باہر ہوتے رہے۔ پروفیسر کے نام سے مشہور حفیظ کی گزشتہ ماہ آسٹریلیا کے خلاف ٹسٹ سیریز کے ذریعے ٹیم میں دوبارہ واپسی ہوئی اور انہوں نے سنچری اسکور کر کے سلیکٹرز کے انتخاب کو درست ثابت کر دکھایا تھا۔ لیکن اس کے بعد سے انہیں مسلسل مشکلات کا سامنا تھا اور آخری 7 ٹسٹ اننگز میں صرف 66 رنز بنائے اورنیوزی لینڈ کے خلاف ابوظہبی میں جاری سیریز کے آخری ٹسٹ میچ کی پہلی اننگز میں بھی بغیر کوئی رن بنائے پویلین لوٹ گئے ۔ نیوزی لینڈ کے خلاف ابوظہبی میں جاری ٹسٹ میچ حفیظ کے کیریئر کا آخری ٹسٹ میچ ہے اور میچ کی دوسری اننگز میں اچھا اسکور کر کے ان کے پاس ٹسٹ کرکٹ کا یادگار انداز میں اختتام کرنے کا نادر موقع ہے۔ محمد حفیظ نے 55 ٹسٹ میچوں کی 104 اننگز میں 10سنچریوں اور12 نصف سنچریوں کی مدد سے 3644 رنز بنائے جبکہ اس کے علاوہ 53 وکٹیں بھی حاصل کیں۔ یاد رہے کہ ایشیا کپ کے اسکواڈ سے خارج کئے جانے کے بعد بھی محمد حفیظ نے سبکدوشی کا فیصلہ کر لیا تھا لیکن پھر ارباب اختیار اور سینئرکھلاڑیوں کے مشورے پر انہوں نے فیصلہ تبدیل کرتے ہوئے کھیل سے کنارہ کش نہ ہونے کا فیصلہ کیا۔ حفیظ نے ابھی صرف ٹسٹ کرکٹ سے کنارہ کشی کا اعلان کیا ہے اور وہ ونڈے اور ٹی20 کرکٹ میں ٹیم کی نمائندگی کا سلسلہ جاری رکھیں گے۔
